თბილისი, 6 ოქტომბერი – Sputnik. პოლიტიკური მოძრაობა „დროას“ ლიდერი ელენე ხოშტარია 200-ზე მეტ საარჩევნო უბანზე ხმების ხელახლა დათვლას მოითხოვს.
თვითმმართველობის არჩევნები საქართველოში 2 ოქტომბერს ჩატარდა. მოსახლეობამ 64 მუნიციპალიტეტის მერობისა და საკრებულოს დეპუტატობის კანდიდატებს მისცა ხმა.
ხოშტარიას თქმით, შემაჯამებელ ოქმებში დისბალანსი გამოვლინდა. ის დარწმუნებულია, რომ შემაჯამებელი ოქმების შესწავლის შემდეგ თბილისის საკრებულოში ოპოზიციის წევრთა რაოდენობა შეიძლება გაიზარდოს.
მაგალითად, ერთ-ერთი ოქმის მიხედვით, საარჩევნო უბანზე სულ დარეგისტრირებული იყო 1.719 ამომრჩეველი, მაგრამ გამოცხადდა „1.752“.
„200-ზე მეტ უბანზე შევიტანეთ გადათვლის მოთხოვნა. ეს რადიკალურად შეცვლის სურათს არა უბრალოდ ციფრებში, არამედ თბილისში, თბილისის საკრებულოში. ეს დაგვიმტკიცებს, რომ რეალურად საკრებულო ეკუთვნის ოპოზიციას“, – განაცხადა ხოშტარიამ.
მისი თქმით, ათობით ისეთი ოქმია აღმოჩენილი, სადაც შედეგები ხელით არის გადასწორებული.
„დავიცავთ თითოეულ ხმას“, – განაცხადა ხოშტარიამ.
საეჭვო ბიულეტენებისა და შემაჯამებელი ოქმების ფოტოები „დროას“ ლიდერმა თავის Facebook-გვერდზე გამოაქვეყნა.
თბილისში პროპორციულ არჩევნებში გამსვლელი ბარიერი პარტიებისთვის 2,5%-ია.
თბილისის საკრებულო 50 დეპუტატისგან შედგება. არჩევნების შედეგებით, მასში შევიდა ექვსი პარტია: „ქართული ოცნება – დემოკრატიული საქართველო“, „ერთიანი ნაციონალური მოძრაობა“, „საქართველოსთვის“, „ლელო საქართველოსთვის“, „გირჩი – მეტი თავისუფლება“ და „ხალხისთვის“.
პროპორციული სიებით მთელი ქვეყნის მასშტაბით ხმების 46,74%-ით „ქართულმა ოცნებამ“ გაიმარჯვა. მეორე ადგილზე გავიდა „ნაციონალური მოძრაობა“ – 30,7%, ხოლო მესამეზე – ექს-პრემიერ გახარიას „საქართველოსთვის – 7,8%.
არჩევნების მეორე ტური 30 ოქტომბერს ჩატარდება.