თბილისი, 4 ოქტომბერი – Sputnik. მადლობა ჩემო დებო და ძმებო, მესმის თქვენი ხმა საპყრობილეში და ბრძოლის სურვილს მიათმაგებს. ვაწვებით გამარჯვებამდე! – სააკაშვილის ეს მიმართვა ჟურნალისტებს „ერთიანი ნაციონალური მოძრაობის“ წევრმა და ქუთაისის მერობის კანდიდატმა ხატია დეკანოიძემ გააცნო.
15:00 საათზე რუსთავის მე-12 სასჯელაღსრულების დაწესებულებასთან სააკაშვილის მხარდამჭერი აქცია დაიწყო, აქციის მონაწილეები ექს-პრეზიდენტს შეძახილებითა და მუსიკით ამხნევებენ.
დეკანოიძემ სასჯელაღსრულების მე-12 დაწესებულება სააკაშვილთან ორსაათიანი შეხვედრის შემდეგ, ცოტა ხნის წინ დატოვა.
დეკანოიძის თქმით, სააკაშვილი საბრძოლო განწყობაზეა და მათ ერთად მეორე ტურის სტრატეგია განიხილეს.
როგორც დეკანოიძე აცხადებს, სააკაშვილი შიმშილობას ისევ აგრძელებს.
სააკაშვილი თბილისში, სანზონაში 1 ოქტომბერს, ადგილობრივ არჩევნებამდე ერთი დღით ადრე დააკავეს. მან არალეგალურად გადმოკვეთა საზღვარი და საქართველოში უკრაინიდან ჩამოვიდა. ხელისუფლების წარმომადგენლებმა არაერთხელ განაცხადეს, რომ თუ სააკაშვილი საქართველოში ჩამოვა, მას დააკავებენ.
მიხეილ სააკაშვილს, რომელსაც 2015 წელს უკრაინის მოქალაქეობა მიენიჭა, საქართველოში სისხლის სამართლის რიგ საქმეებზე აქვს ბრალი წაყენებული, აქედან ორ საქმეზე განაჩენი დაუსწრებლად გამოუტანეს, დანარჩენები კი სასამართლო წარმოებაშია.
სააკაშვილს საქართველოში დაუსწრებლად განაჩენი გამოტანილი აქვს ორ საქმეზე – სანდრო გირგვლიანის მკვლელობის საქმეზე დაპატიმრებულთა ამნისტიის და დეპუტატ ვალერი გელაშვილის ცემის ფაქტებზე. პირველ საქმეზე მას 3 წლით პატიმრობა, ხოლო მეორეზე - 6 წლით თავისუფლების აღკვეთა აქვს მისჯილი.
გარდა ამისა, მიხეილ სააკაშვილი ბრალდებულია „ტელეიმედის“ დარბევის, 7 ნოემბრის დარბევის და პატარკაციშვილების ქონების უკანონოდ დაუფლების, აგრეთვე სახელმწიფო დაცვის სპეციალური სამსახურის კუთვნილი 9.024.367 ლარის მისი პირადი მიზნებისთვის გაფლანგვის ფაქტებზე. აღნიშნულ საქმეებზე სასამართლო განხილვები მიმდინარეობს.