თბილისი, 3 ოქტომბერი – Sputnik. ოპოზიციური პარტია „საქართველოსთვის“ თბილისის მერის არჩევნების მეორე ტურში მხარს არც ერთ კანდიდატს არ დაუჭერს, განაცხადა ყოფილი პრემიერ გიორგი გახარიას პარტიის წევრმა კახაბერ ქემოკლიძემ.
ადგილობრივი არჩევნების მეორე ტური 30 ოქტომბერს გაიმართება. ცესკოს წინასწარი მონაცემებით, გახარიას პარტია იკავებს მესამე ადგილს „ქართული ოცნების“ და „ერთიანი ნაციონალური მოძრაობის“ შემდეგ. გახარიას პარტიის კანდიდატმა მეორე ადგილი მხოლოდ ცაგერში დაიკავა. მეორე ტურში ბესარიონ ბენდელიანი (35,01%) მერობისთვის ბრძოლაში დაუპირისპირდება მმართველი პარტიის კანდიდატ გიორგი ნემსაძეს (49,34%).
„ბატონი გახარია, ისევე როგორც ჩვენი პარტია, ემხრობა ცვლილებებს. ჩვენ მიგვაჩნია, რომ დღეს „ქართულმა ოცნებამ“ შექმნა უდიდესი შესაძლებლობა იმის, რომ ფაქტობრივად, პრაქტიკულ დონეზე ხელისუფლებაში დააბრუნოს „ნაციონალური მოძრაობა“, რომელიც მიგვაჩნია, რომ იყო გუშინწინდელი დღე, ისევე როგორც „ქართული ოცნება“ არის გუშინდელი დღე. თქვენს კითხვაზე, ვის დაუჭერთ მხარს, შეგიძლიათ, გააკეთოთ მარტივი ლოგიკური დასკვნა, რომ არც ერთს და არც მეორეს“, – განუცხადა ჟურნალისტებს კახაბერ ქემოკლიძემ.
მისი თქმით, ის ამომრჩევლები, რომლებმაც მხარი დაუჭირეს პარტიას „საქართველოსთვის“, ძალიან კარგად ერკვევიან არსებულ პოლიტიკურ მოცემულობაში. ამიტომ მათ არ დასჭირდებათ მოწოდება, ან ერთ მხარეს წავიდნენ, ან მეორე მხარეს.
საქართველოში 2 ოქტომბერს თვითმმართველობის არჩევნები ჩატარდა. ქვეყნის მოსახლეობამ 64 მუნიციპალიტეტის საკრებულოს დეპუტატობისა და მერობის კანდიდატებს მისცა ხმა.
მმართველი პარტია „ქართული ოცნება“ და მისი მთავარი კონკურენტი, ყველაზე მსხვილი ოპოზიციური პარტია „ერთიანი ნაციონალური მოძრაობა“ ემზადებიან მეორე ტურისთვის, რომელიც, ცესკოს წინასწარი მონაცემებით, 20 ქალაქში გაიმართება, მათ შორის თბილისში, სადაც ვერც ერთმა კანდიდატმა 50%-ზე მეტი ხმა ვერ მოიპოვა.
ცესკოს მონაცემებით, თბილისში კალაძემ მოაგროვა 44,97%, ხოლო მისმა მთავარმა კონკურენტმა „ერთიანი ნაციონალური მოძრაობიდან“ ნიკა მელიამ - 33,98%.