თბილისი, 28 სექტემბერი — Sputnik. ახალგაზრდა, რომელმაც საფრანგეთის პრეზიდენტ ემანუელ მაკრონს კვერცხი ესროლა, ფსიქიატრიულ სავადმყოფოში მოათავსეს, იუწყება ტელეარხი BFMTV.
გავრცელებული ინფორმაციით, 19 წლის სტუდენტი, რომელმაც ლიონში მყოფ მაკრონს კვერცხი ესროლა, დააკავეს და პოლიციაში გადაიყვანეს. ინციდენტი 27 სექტემბერს მოხდა, როდესაც პრეზიდენტი Eurexpo-ს გამოფენას ეწვია.
ლიონის პროკურატურის მოთხოვნით ახალგაზრდას ფსიქიატრიული ექსპერტიზა ჩაუტარდა, რომელმაც მისი შესაბამის კლინიკაში იძულებითი ჰოსპიტალიზაციის აუცილებლობა გამოავლინა. სტუდენტი ლიონის მახლობლად მდებარე ქალაქ ბრონის ფსიქიატრიულ კლინიკა Vinatier-ში მოათავსეს.
ამასთან მის წინააღმდეგ სისხლის სამართლის საქმეც აღიძრა — სტუდენტს ხელისუფლების წარმომადგენელზე ძალადობა ედება ბრალად.