თბილისი, 24 სექტემბერი – Sputnik. აზიის განვითარების ბანკმა (ADB) საქართველოს მთავრობას COVID-19-ის საწინააღმდეგო ვაქცინების შესაძენად 15 მილიონი აშშ დოლარის ოდენობის სესხი დაუმტკიცა, ნათქვამია ADB-ს განცხადებაში.
ბანკის მიერ საქართველოსთვის გამოყოფილი თანხა დაახლოებით 700.000 დოზა COVID-19-ის საწინააღმდეგო ვაქცინის, ასევე ნემსების, უსაფრთხოების ყუთებისა და ვაქცინაციისთვის საჭირო სხვა ნივთების შეძენასა და ჩამოტანას უნდა მოხმარდეს.
საქართველოს მთავრობის მიზანია 2021 წლის ბოლომდე ქვეყნის ზრდასრული მოსახლეობის 60%-ის, ანუ 1,7 მილიონი ადამიანის აცრა. ADB-ს დახმარება 300.000-ზე მეტი მოქალაქის, ანუ საქართველოს მთლიანი მოსახლეობის 8%-ის აცრას გახდის შესაძლებელს, აღნიშულია ბანკის მიერ გავრცელებულ ინფორმაციაში.
სესხს აფინანსებს ADB-ს აზია–წყნარი ოკეანის ვაქცინაზე ხელმისაწვდომობის 9 მილიარდი დოლარის პროგრამა, რომელიც 2020 წლის დეკემბერში დაარსდა და ბანკის წევრ განვითარებად ქვეყნებს ვაქცინასთან დაკავშირებულ სწრაფ და მიუკერძოებელ დახმარებას სთავაზობს.
საქართველოში მასობრივი ვაქცინაცია 5 ივლისს დაიწყო, მას შემდეგ, რაც ქვეყანამ ჩინური წარმოების Sinopharm-ის და Sinovac-ის ვაქცინების მილიონი დოზა მიიღო. ამ დროისათვის ქვეყანაში პრეპარატ Pfizer-ით 16 წლიდან პირთა ვაქცინაცია მიმდინარეობს. რაც შეეხება 18 წლის და ზემოთ ასაკის პირებს, მათ არჩევანის გაკეთება შეუძლიათ პრეპარატ Pfizer-ს, Sinopharm-სა და Sinovac-ს შორის. 45 წელს ზემოთ პირებს დამატებით AstraZeneca-ს არჩევაც შეუძლიათ.
24 სექტემბრის მონაცემებით, საქართველოში აცრილია 1.715.073 ადამიანი, მათგან ორი დოზით – 751.410 პირი, რაც ზრდასრული მოსახლეობის 26.3%-ია.
საქართველო ADB-ს წევრია 2007 წლიდან და მას შემდეგ ბანკი ქვეყნის განვითარების ხელშეწყობის ერთ-ერთი ყველაზე დიდი და მრავალმხრივი პარტნიორია.