თბილისი, 2 სექტემბერი – Sputnik. საქართველოსა და ჩრდილოეთ მაკედონიას შორის უვიზო რეჟიმის შემოღება ორ ქვეყანას შორის თანამშრომლობის ახალი ეტაპის დასაწყისია, განაცხადა საქართველოს საგარეო საქმეთა მინისტრმა დავით ზალკალიანმა.
„უვიზო რეჟიმის შემოღების შესახებ შეთანხმება საქართველოსა და ჩრდილოეთ მაკედონიას შორის ძალაში შევიდა, რამაც ჩვენი თანამშრომლობა ახალ საფეხურზე აიყვანა და კარს უღებს ჩვენს ქვეყნებს შორის კავშირების გაფართოებას! ვულოცავ საქართველოს და ჩრდილოეთ მაკედონიას!“ – დაწერა ზალკალიანმა Twitter-ზე.
საქართველოსა და ჩრდილოეთ მაკედონიას შორის უვიზო მიმოსვლის შესახებ შეთანხმება ძალაში 1 სექტემბერს შევიდა.
შეთანხმებას „საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისგან გათავისუფლების შესახებ“ ხელი მიმდინარე წლის მაისში ჩრდილოეთ მაკედონიაში საქართველოს პრეზიდენტის სალომე ზურაბიშვილის ოფიციალური ვიზიტის დროს მოეწერა.
საქართველოს სრულად ან ნაწილობრივ უვიზო რეჟიმი მსოფლიოს 116 ქვეყანასთან აქვს.