თბილისი, 29 აგვისტო – Sputnik. UFC-ს მებრძოლმა ნახევრად მსუბუქ წონაში გიგა ჭიკაძემ მისი კარიერის ყველაზე მნიშვნელოვანი ბრძოლა მოიგო - ლას-ვეგასის ოქტაგონზე მან გამოცდილი ბრაზილიელი მებრძოლი ედსონ ბარბოსა მესამე რაუნდში ტექნიკური ნოკაუტით დაამარცხა.
33 წლის ჭიკაძისთვის ეს გამარჯვება UFC-ში ზედიზედ მეშვიდე გახდა და მესამეა, რომელიც ნოკაუტით მოიგო.
ამ წარმატების შედეგად ქართველმა მებრძოლმა დაიპყრო რამდენიმე მნიშვნელოვანი ნიშნული. კერძოდ, ჭიკაძემ მიაღწია იმას, რაც ვერ შეძლო 2017 წელს ჰაბიბ ნურმაგომედოვმა, რომელსაც გამოცდილი ბარბოსას დასამარცხებლად სამივე რაუნდის ბოლომდე ჩატარება მოუწია. ასევე ჭიკაძე მოგებების რაოდენობით დაეწია UFC-ს მოქმედ ჩემპიონს ნახევრად მსუბუქ წონაში ალექსანდრ ვოლკანოვსკის.
აღსანიშნავია, რომ ჭიკაძე ზედიზედ მოპოვებული გამარჯვებების რაოდენობით გაუტოლდა ლეგენდარულ კონორ მაკგრეგორს.
ბარბოსასთან მოპოვებული გამარჯვების შემდეგ ტიტულის ექს-პრეტენდენტმა ნახევრად მსუბუქ წონაში გილბერტ ბერნსმა ქართველს „მონსტრი“ უწოდა.
ბარბოსასთან ჩხუბამდე ჭიკაძე თავის წონით კატეგორიის რეიტინგში მე-10 ადგილს იკავებდა. თამამად შეიძლება ითქვას, რომ ბრაზილიელის დამარცხების შემდეგ ქართველი სპორტსმენი რამდენიმე პოზიციით დაწინაურდება.