თბილისი, 26 აგვისტო − Sputnik. სხვადასხვა სუნის აღქმის დარღვევა კვლავაც მიიჩნევა კორონავირუსის ერთ-ერთ ძირითად სიმპტომად და ეს უნდა იყოს ინფიცირებაზე ტესტის გაკეთების მიზეზი, წერს გამოცემა Express-ი პროფესორ ტიმ სპექტორის ხელმძღვანელობით ჩატარებულ კვლევაზე დაყრდნობით.
COVID-19-ის სიმპტომების კვლევამ აჩვენა, რომ ყნოსვის დაკარგვა − ანოსმია − ახალი ტიპის კორონავირუსით ინფიცირების ერთ-ერთი ყველაზე აშკარა ნიშანი და „საუკეთესო პრედიქტორია“ პანდემიის დაწყების მომენტიდან დღემდე.
თუმცა, როგორც მკვლევარები ამბობენ, ისეც ხდება, რომ ყოველდღიური საქმეებითა და პრობლემებით დაკავებული ადამიანები ზოგჯერ ვერ ამჩნევენ ამ ცვლილებას. ამიტომ სწავლულებმა რამდენიმე არომატი გამოყვეს, რომლებიც ყნოსვის მდგომარეობის დადგენაში დაგვეხმარება.
ეს არომატებია:
ყავის სუნი
ნივრის სუნი
ქოქოსის სუნი
ფორთოხლის სუნი.
„თუ ამ ინგრედიენტებიდან თუნდაც ერთის სუნს ვერ გრძნობთ, კარგი იქნება, თუ COVID-19-ზე ტესტს გაიკეთებთ. თუ სწრაფი ტესტი დადებითი აღმოჩნდება, თვითიზოლაციაში უნდა გადახვიდეთ და PCR–ტესტი შეუკვეთოთ“, − ამბობენ მკვლევარები.
ამავდროულად მეცნიერები განმარტავენ, რომ ადამიანი შესაძლოა მაშინაც კი იყოს კორონავირუსით ინფიცირებული, თუ ყნოსვა სრულიად ნორმალური აქვს.
კორონავირუსით ინფიცირების სხვა ნიშნებია: დაღლილობა, თავის ტკივილი, მაღალი ტემპერატურა, ხველება.
ბრიტანელი სპეციალისტების თქმით, ვაქცინირებულ, მაგრამ მაინც ინფიცირებულ ადამიანებში დაავადების ყველაზე გავრცელებული სიმპტომებია: თავის ტკივილი, სურდო, ცემინება, ყელის ტკივილი და ყნოსვის დაქვეითება.