თიბილაშვილმა ტოკიოს პარალიმპიადაზე ვერცხლი მოიპოვა

თბილისი, 25 აგვისტო – Sputnik. პარამოფარიკავე ნინა თიბილაშვილი ტოკიოს პარალიმპიური თამაშებზე ფინალში დამარცხდა და საბოლოოდ ვერცხლის მედალს დაეუფლა.

თიბილაშვილი ფინალურ ეტაპზე ჩინელ პარამოფარიკავე ბიან ძინთან 7:15 დამარცხდა. მანამდე ქართველმა პარამოფარიკავემ საკვალიფიკაციო ეტაპზე ოთხი შეხვედრიდან ორი მოიგო და მერვედფინალურ ეტაპზე გავიდა. ძირითადი ბადის პირველ ეტაპზე მან იტალიელი ლორედანა ტრიგილია დაამარცხა ანგარიშით 15:9, მეოთხედფინალში კი უკრაინელი ნატალია მორკვიჩის ბარიერი დაძლია (15:13). ნახევარფინალში ქართველმა პარამოფარიკავემ ასევე უკრაინელი ევგენია ბრეუსის დამარცხებაც მოახერხა (15:12) და ფინალში გავიდა.

რაც შეეხება კიდევ ერთ პარამოფარიკავეს ირმა ხეცურიანს, ის ჯერ ნახევარფინალში ჩინელ შუმაი ტანთან ანგარიშით 8:15 დამარცხდა, ბრინჯაოს მედლისთვის ბრძოლა კი კვლავ ჩინეთის წარმომადგენელ რონ ქსიაოსთან დათმო (6:15).

ტოკიოს პარალიმპიადაზე საქართველო სპორტის ექვს სახეობაში 13 სპორტსმენით არის წარმოდგენილი. ქართველმა პარამოფარიკავეებმა ასპარეზობა დაასრულეს. ქართველი პარასპორტსმენები ასევე იასპარეზებენ პარაძიუდოში, პარაწოლჭიმში, პარაცურვაში, პარასროლაში და პარამძლეოსნობაში.

ტოკიოს პარალიმპიური თამაშები 24 აგვისტოდან 5 სექტემბრამდე პერიოდში ტარდება და მასში მონაწილეობას 162 ქვეყნის დაახლოებით 4.500 სპორტსმენი იღებს.