თბილისი, 12 აგვისტო – Sputnik. „თბილსერვის ჯგუფმა“ მეტეხის გვირაბში მასშტაბური გეგმურ-პროფილაქტიკური სამუშაოები ჩაატარა, ნათქვამია თბილისის მერიის ადმინისტრაციის მიერ გავრცელებულ განცხადებაში.
უწყების ცნობით, მეტეხის გვირაბში ჩატარდა დასუფთავების აქცია, რომლის ფარგლებშიც გვირაბის შიდა და გარე პერიმეტრი მოწესრიგდა, გარე განათების საექსპლუატაციო დეპარტამენტის თანამშრომლებმა ძველი და ექსპლუატაციიდან გამოსული სანათები შეცვალეს.
გვირაბში მოეწყო ელექტროენერგიის ქსელი და დამონტაჟდა 350 ერთეული LED სანათი. ასევე 810 კვ.მ ფართობზე დაიხაზა გზის გამყოფი და გზისპირა ღერძულა ხაზები.
აღნიშნული სამუშაოების ჩატარების გამო გვირაბში 11 აგვისტოს 21:00 საათიდან 12 აგვისტოს 06:00 საათამდე ავტომობილების გადაადგილება შეზღუდული იყო.
ადგილზე „თბილსერვის ჯგუფის“ 150-მდე თანამშრომელი და სპეცტექნიკა იყო მობილიზებული.