თბილისი, 10 აგვისტო – Sputnik. წინასაარჩევნო კამპანიის დროს პარტია „მოქალაქეები“ ძირითად აქცენტს თბილისზე გააკეთებს, განაცხადა პარტიის ერთ-ერთმა ლიდერმა ლევან იოსელიანმა.
საქართველოში ადგილობრივი თვითმმართველობის არჩევნები 2 ოქტომბერს ჩატარდება. მოსახლეობა 64 მუნიციპალიტეტის საკრებულოს დეპუტატებს და ამდენივე მერს აირჩევს.
„კონცენტრირებული ვიქნებით ძირითადად თბილისში. გვეყოლება ძირითადად ქალი კანდიდატები, ძალიან მებრძოლი, ურბანული საკითხებით დაინტერესებული ახალგაზრდა ადამიანები, რომლებიც იბრძოლებენ, რომ შევიდნენ თბილისის საკრებულოში“, – განაცხადა იოსელიანმა.
მისი თქმით, პარტია ასევე იბრძოლებს ადგილებისთვის ქუთაისის საკრებულოში.
„სავარაუდოდ, მომავალ კვირაში გვექნება ჩვენი საარჩევნო პროგრამის და საარჩევნო კამპანიის პრეზენტაცია. გვექნება ძალიან საინტერესო და განსხვავებული კამპანია“, – აღნიშნა იოსელიანმა.
თბილისის საკრებულოში 50 დეპუტატია. აქედან ათს მაჟორიტარული, ხოლო 40-ს – პროპორციული სისტემით აირჩევენ.