თბილისი, 7 აგვისტო — Sputnik. „საქართველოს ლეიბორისტულმა პარტიამ“ თბილისის მერის პოსტზე მიხეილ ქუმსიშვილი წარადგინა და ასევე დაასახელა საკრებულოს თავმჯდომარის კანდიდატურა.
საქართველოში ადგილობრივი თვითმმართველობის არჩევნები 2 ოქტომბერს გაიმართება. ქვეყნის მოსახლეობა 64 მუნიციპალიტეტის საკრებულოს დეპუტატებს და ამდენივე მერს აირჩევს.
„დღეს თბილისის მერობის კანდიდატად ვასახელებთ პარტიის ახალგაზრდულის ლიდერს, უნიჭიერეს მიხეილ ქუმსიშვილს, საკრებულოს თავმჯდომარის პოსტზე კი ცნობილ პოლიტიკოსს, ეკოლოგსა და მებრძოლ ლაშა ჩხარტიშვილს“, – განაცხადა პარტიის თავმჯდომარე შალვა ნათელაშვილმა.
თბილისის მერობისთვის ქუმსიშვილის გარდა, საკუთარ ძალებს მოსინჯავენ დედაქალაქის მოქმედი მერი, მმართველი პარტია „ქართული ოცნების“ კანდიდატი კახა კალაძე და ოპოზიციური პარტია „ერთიანი ნაციონალური მოძრაობის“ ლიდერი ნიკა მელია, რომელიც ოპოზიციური პარტიების ნაწილმა მერობის კანდიდატად დაასახელა.