თბილისი, 7 აგვისტო — Sputnik. თბილისის მერმა კახა კალაძემ პირადად მიიღო მონაწილეობა ქალაქის ქუჩებიდან საყოფაცხოვრებო ნარჩენების გატანაში მას შემდეგ, რაც „თბილსერვის ჯგუფის“ გარკვეული ნაწილი გაიფიცა.
შესაბამისი ვიდეო ქალაქის თავის ოფიციალურ ფეისბუქ-გვერდზე ქვეყნდება.
მანამდე კომპანია „თბილსერვის ჯგუფის“ თანამშრომლებმა სამუშაო პირობების გაუმჯობესებისა და ანაზღაურების მომატების მოთხოვნით საპროტესტო აქცია გამართეს და განაცხადეს, რომ კომპანიის ხელმძღვანელებმა ხელშეკრულებით დადგენილი პირობები შეცვალეს და ახლა მუშაობა რთულ პირობებში უწევთ.
მოგვიანებით თანამშრომლების ნაწილმა გაფიცვა შეწყვიტა და სამუშაო რეჟიმს დაუბრუნდა. როგორც მერიაში აცხადებენ, მოთხოვნათა დიდი ნაწილი უკვე შესრულებულია, კერძოდ, უნიფორმებისა და სპეცტექნიკის განახლების მიმართულებით ნაბიჯები უკვე გადადგმულია.
„ნამდვილად არ გვქონდა ისეთი ურთიერთობა, ერთმანეთს ვერ დავლაპარაკებოდით, რამე ვერ გადაგვეწყვიტა, მოგვესმინა ერთმანეთის მოსაზრებები. უეცრად, რამდენიმე ადამიანის ხელმძღვანელობით, იყო გაფიცვის მცდელობა <...>. ჩვენ დღეს მოვისმინეთ ძალიან ბევრი სიცრუე. გასულ წელს ხელფასების 20-პროცენტიანი მატება იყო და მიეცათ დაპირება, რომ 2022 წლის იანვარში დაუბრუნდებოდნენ ამ საკითხს“, — განაცხადა კახა კალაძემ.
მისი თქმით, თანამშრომლების ნაწილზე, რომლებმაც გაფიცვა შეწყვიტეს და საქმიანობას დაუბრუნდნენ, იყო ბულინგისა და დაშინების მცდელობა. ქალაქის თავის განცხადებით, ეს სისხლის სამართლის დანაშაულია და „რა თქმა უნდა, ჩვენ არ მივცემთ შესაძლებლობას, რომ რამდენიმე კრიმინალმა შეურაცხყოფა მიაყენოს თანამშრომლებს, დაემუქროს და ფიზიკურად გაუსწორდეს, ეს არის დასჯადი და ყოველთვის მოჰყვება შესაბამისი რეაგირება“.