თბილისი, 5 აგვისტო — Sputnik. ნიდერლანდებმა საქართველოს ინფიცირების „მაღალი რისკის ქვეყნის“ სტატუსი მიანიჭა, გადაწყვეტილება 8 აგვისტოდან ამოქმედდება, ნათქვამია საქართველოში ნიდერლანდების საელჩოს მიერ გავრცელებულ განცხადებაში.
მანამდე, საქართველოს 8 აგვისტოდან „წითელი ზონის“ ქვეყნების სიაში შეყვანის გადაწყვეტილება მიიღო დიდმა ბრიტანეთმაც.
საელჩოს ცნობით, საქართველოსთვის ჯერჯერობით ნარჩუნდება ე.წ. „ნარინჯისფერი კოდი“, რაც ნიშნავს, რომ საქართველოს მოქალაქეებს შესაძლებლობა ექნებათ ნიდერლანდებში ჩავიდნენ.
თუმცა, 8 აგვისტოდან ნიდერლანდებში ჩასულმა საქართველოს მოქალაქეებმა ვაქცინაციის დამადასტურებელ ცნობასთან ერთად უნდა წარადგინონ ბოლო 72 საათში ჩატარებული PCR-ტესტის უარყოფითი პასუხი. გარდა ამისა, ნიდერლანდებში ჩასვლისას ისინი სავალდებულო 10–დღიან კარანტინს დაექვემდებარებიან.
იზოლაციაში მყოფ პირს შესაძლებლობა ექნება კარანტინში ყოფნიდან მეხუთე დღეს ჩაიტაროს PCR-ტესტი და, უარყოფითი პასუხის შემთხვევაში, დატოვოს იზოლაცია.
საქართველოში კორონავირუსის მეოთხე ტალღა მძვინვარებს. ბოლო დღე–ღამეში ქვეყანაში კორონავირუსის 3.670 ახალი შემთხვევა გამოვლინდა. პანდემიის დაწყებიდან დღემდე ინფიცირების 436 ათასზე მეტი შემთხვევა დაფიქსირდა, გამოჯანმრთელდა 393 ათასზე მეტი ადამიანი, გარდაიცვალა 5.986 პირი.