თბილისი, 28 ივლისი – Sputnik. ტოკიოს ოლიმპიადის მეხუთე დღე საქართველოსთვის „ოქროს დღე“ გახდა. საპატიო კვარცხლბეკის უმაღლეს საფეხურზე ავიდა ძიუდოისტი ლაშა ბექაური (-90 კგ).
ლაშა ბექაური - ძიუდო (-90 კგ)
იმაში, რომ ლაშა ბექაური ოლიმპიური ჩემპიონი გახდა, გარკვეული კანონზომიერება არსებობს. სწორედ 90 კილოგრამ წონით კატეგორიაში აქვთ მოგებული ყველაზე მეტი ოლიმპიური ოქრო ქართველ ძიუდოისტებს. მეტიც, დამოუკიდებელი საქართველოს ისტორიაში პირველი ოქროს მედალი მოიპოვა ზურაბ ზვიადაურმა, რომელიც ამ წონით კატეგორიაში გამოვიდა. ეს მოხდა ათენში 2004 წელს.
მომდევნო თამაშებზე პეკინში (2008) ტრადიცია გააგრძელა ირაკლი ცირეკიძემ, ხოლო რიო-დე-ჟანეიროს ოლიმპიადაზე (2016) ვარლამ ლიპარტელიანი ვერცხლის მედალოსანი გახდა. ახლა კი ლაშა ბექაურმა მიაღწია წარმატებას.
მაგრამ 21 წლის ბექაურმა ტოკიოს ოლიმპიადა კინაღამ გამოტოვა. დაახლოებით ერთი თვის წინ ბუდაპეშტში ჩატარებულ მსოფლიო ჩემპიონატზე ქართველმა ძიუდოისტმა მხრის სერიოზული ტრავმა მიიღო და თამაშებში მისი მონაწილეობა საეჭვო იყო. სპორტსმენს გამოჯანმრთელებაში დაეხმარა საქართველოს ოლიმპიური ნაკრების მთავარი ექიმი ზურაბ კახაბრიშვილი.
„ზურაბ კახაბრიშვილი მსოფლიოში საუკეთესო ექიმია. ერთი თვის წინ ბუდაპეშტში მხარი დავიზიანე და შეშინებულები ვიყავით, რომ ტოკიოში ვერ წავიდოდი. მისი წყალობით დღეს თავს შესანიშნავად ვგრძნობდი და მომეცა შესაძლებლობა მეჩვენებინა ჩემი ძიუდო“, - განაცხადა ბექაურმა დაჯილდოების ცერემონიის დასრულების შემდეგ.
ბექაურის მედალი გახდა ოლიმპიურ თამაშებზე საქართველოს ეროვნული ნაკრების მიერ მოპოვებული მესამე მედალი და პირველი ოქროს მედალი. მანამდე ოლიმპიურ თამაშებზე კიდევ ორი ძიუდოისტი გახდა ვერცხლის მედალოსანი - ვაჟა მარგველაშვილი (-66 კგ) და ლაშა შავდათუაშვილი (-73 კგ).
აღსანიშნავია ისიც, რომ საქართველოს ნაკრების ძიუდოისტები არასდროს დაბრუნებულან ოლიმპიური თამაშებიდან მედლების გარეშე 1996 წლიდან (ატლანტა). ამ დროისათვის ქართველ სპორტსმენებს ოლიმპიურ თამაშებზე სულ 35 მედალი აქვთ მოპოვებული, აქედან 11 ძიუდოისტების ანგარიშზეა (4 ოქრო, 4 ვერცხლი და 3 ბრინჯაო).
ბექაურის ოქროს წყალობით საქართველოს ნაკრები საერთო გუნდურ ჩათვლაში მკვეთრად დაწინაურდა და 36-ე ადგილიდან მე-19-ზე გადაინაცვლა.
ნიკოლოზ ბასილაშვილი - ჩოგბურთი
Николоз Басилашвили
© AFP 2024 / GLYN KIRK
სამწუხაროდ, საქართველოს უძლიერესმა ჩოგბურთელმა ნიკოლოზ ბასილაშვილმა (ATP-ს რეიტინგში 42-ე ადგილი) დაასრულა თავისი ასპარეზობა ოლიმპიურ თამაშებზე. 1/16 ფინალში ბასილაშვილი ორ სეტში - 4:6, 6:7 დამარცხდა მსოფლიოს მეხუთე ჩოგანთან, გერმანიის წარმომადგენელ ალექსანდრ ზვერევთან.
29 ივლისს საქართველოს ნაკრები ოლიმპიურ თამაშებზე წარმოდგენილი იქნება ორი სპორტსმენით – ოლიმპიურ ტატამზე გამოვა ძიუდოისტი ვარლამ ლიპარტელიანი (-100 კგ), ხოლო ნინო სალუქვაძე 25 მ დისტანციაზე სპორტული პისტოლეტიდან სროლაში კვალიფიკაციის გავლას შეეცდება.