თბილისი, 20 ივლისი – Sputnik. მოსახლეობა მოშვებულია, პირბადეს ადამიანები დახურულ სივრცეებშიც აღარ ატარებენ, ამიტომ დღეს მივიღეთ გადაწყვეტილება, რომ ღია სივრცეებშიც დაწესდეს პირბადესთან დაკავშირებული რეგულაციები, განაცხადა დაავადებათა კონტროლის ეროვნული ცენტრის დირექტორმა ამირან გამყრელიძემ ბრიფინგზე.
მანამდე ჯანდაცვის სამინისტროში განაცხადეს, რომ კორონავირუსით ინფიცირების მზარდი შემთხვევების გამო, შესაძლოა, ქვეყანაში გარკვეული შეზღუდვები ისევ დაწესდეს.
„რიგი გამკაცრებები, რა თქმა უნდა, იქნება, პირველ რიგში აღსრულებასთან მიმართებით. თქვენ იცით, რომ ჩვენ ვიძლეოდით რეკომენდაციებს ღია სივრცეში, სადაც არის კოლექტიური შეკრებები, აუცილებელი ყოფილიყო ნიღბის ტარება. ამასთან დაკავშირებით მიდის მსჯელობა“, – აღნიშნა გამყრელიძემ.
მისი ინფორმაციით, შტაბი დაამუშავებს აღნიშნულ საკითხს და შესაბამისი ცვლილებები პირბადის ტარებასთან დაკავშირებით უახლოეს მომავალში ამოქმედდება.
საქართველოში 2020 წლის 28 ნოემბრიდან მოქმედებდა შეზღუდვები, რომლებიც 2021 წლის 31 იანვრის ჩათვლით იყო ძალაში. შეზღუდვების ეტაპობრივი შემსუბუქება თებერვლიდან დაიწყო.
ამჟამად საქართველოში თითქმის ყველა შეზღუდვა გაუქმებულია. დარჩენილი შეზღუდვებიდან მოქმედებს პირბადის ტარების რეჟიმი საზოგადოებრივ ტრანსპორტსა და დახურულ სივრცეებში, აკრძალულია სოციალური ღონისძიებების ჩატარება და ღამის კლუბების მუშაობა.