თბილისი, 14 ივლისი — Sputnik. სოფელ ქვემო ჭალის მკვიდრი ზაზა გახელაძე ცხინვალის ციხეში ერთწლიანი პატიმრობის შემდეგ გათავისუფლდა.
„ზაზა გახელაძე თავისუფალია“, - დაწერა პრემიერ-მინისტრმა ირაკლი ღარიბაშვილმა Facebook-ზე.
ამ სიახლეს სოციალურ ქსელში უამრავი პოზიტიური კომენტარი მოყვა და ის დღის მოვლენად იქცა.
გავრცელებული ინფორმაციით, გახელაძე ცხინვალის დე-ფაქტო ხელისუფლებამ შეიწყალა.
გახელაძე 2020 წლის 11 ივლისს სხვილოს ციხესთან გამყოფი ზონის მიმდებარედ დააკავეს. ცხინვალის ვერსიით, გახელაძემ მიმალვა სცადა და სამხედროების მისამართით დაახლოებით 10 გასროლა განახორციელა. ცხინვალში მას 12 წლითა და 6 თვით პატიმრობა მიუსაჯეს, ადგილობრივმა სასამართლომ ის დამნაშავედ ცნო „სამართალდამცავი ორგანოების თანამშრომლის სიცოცხლის ხელყოფასა“ და „საზღვრის უკანონო კვეთაში“.
გახელაძის განაჩენმა საქართველოში დიდი რეზონანსი გამოიწვია. მისი გათავისუფლების საკითხი განიხილებოდა ყველა ფორმატის შეხვედრებზე თბილისსა და მოსკოვისა და ცხინვალის წარმომადგენლებს შორის.
დაკავებულის ოჯახი მასთან შეხვედრას მოითხოვდა და საქართველოს მიერ არაკონტროლირებად ტერიტორიაზე გადასვლითაც კი იმუქრებოდა. გახელაძის ციხეში ყოფნის პერიოდში მისმა ნათესავებმა მისი მონახულება მხოლოდ ერთხელ შეძლეს - წითელი ჯვრის დახმარებით.
გუშინ ერგნეთში ინციდენტების პრევენციისა და მათზე რეაგირების მექანიზმის (IPRM) 101-ე სხდომა გაიმართა. საქართველოს სახელმწიფო უსაფრთხოების სამსახურის საინფორმაციო-ანალიტიკური დეპარტამენტის დირექტორის მოადგილემ ირაკლი ანთაძემ შეხვედრის შემდეგ განაცხადა, რომ გახელაძის საქმეში წინსვლა შეინიშნებოდა.