თბილისი, 30 ივნისი – Sputnik. სამართალდამცველებმა ზესტაფონში მომხდარი მკვლელობის საქმეზე სამი პირი დააკავეს, ნათქვამია საქართველოს პროკურატურის მიერ გავრცელებულ განცხადებაში.
შემთხვევა დღეს ზესტაფონში, თამარ მეფის ქუჩაზე მოხდა.
გამოძიების ინფორმაციით, ერთ-ერთ საცხოვრებელ სახლში სუფრაზე სტუმრებს შორის სიტყვიერი შელაპარაკება ფიზიკურ დაპირისპირებაში გადაიზარდა, რა დროსაც ერთ-ერთმა მათგანმა ახალგაზრდა მამაკაცს ინსპექტორ-გამომძიებლის კუთვნილი პისტოლეტიდან ესროლა.
დაშავებული გულ-მკერდის არეში მიღებული ჭრილობის შედეგად საავადმყოფოში მიყვანამდე გარდაიცვალა.
გამოძიების მიხედვით, მომხდარი დანაშაულის შემდეგ ერთ-ერთმა ბრალდებულმა საქმისთვის მნიშვნელოვანი მტკიცებულებები გაანადგურა.
მომხდარზე დაკავებული არიან: შსს-ს რაჭა-ლეჩხუმისა და ქვემო სვანეთის პოლიციის დეპარტამენტის ინსპექტორ-გამომძიებელი (სსკ-ის 236-ე მუხლი - ცეცხლსასროლი იარაღისა და საბრძოლო მასალის გადაცემა), ასევე ერთი პირი განზრახ მკვლელობისა და ცეცხლსასროლი იარაღისა და საბრძოლო მასალის მართლსაწინააღმდეგო შეძენა-ტარების ბრალდებით (სსკ-ის 108-ე და 236-ე მუხლები), მესამე დაკავებულს კი გამოძიება ნივთიერი მტკიცებულებების განადგურებას ედავება (სსკ-ის 368-ე მუხლი).
ინსპექტორ-გამომძიებლის მიმართ სისხლის სამართლის საქმე ცალკე წარმოებად გამოიყო და გამოძიებას პროკურატურა აწარმოებს.
უწყების ინფორმაციით, სისხლის სამართლის საქმეებზე გამოძიება გრძელდება.