თბილისი, 30 ივნისი – Sputnik. ლანჩხუთის მუნიციპალიტეტის სოფელ ნინოშვილში მგელმა საქონელი დაგლიჯა, იუწყება ტელეკომპანია Rustavi2.
მგელი ჩხარტიშვილების ეზოში ღამით შეიპარა და ორ ძროხას დაესხა თავს. როგორც ადგილობრივები ამბობენ, ხმაური და საქონლის ხმა გაიგონეს, მაგრამ გარეთ გამოსვლის შეეშინდათ. მათ ისიც არ იციან, მგელი ერთი იყო თუ რამდენიმე.
ადგილობრივები შიშობენ, რომ საფრთხე მათ, ბავშვებსა და საქონელს კვლავ ემუქრება და ხელისუფლებას დახმარებას სთხოვენ.
ეს წელს მგლების თავდასხმის პირველი შემთხვევა არ არის. მაისში რუსთავთან მგელი შუახნის მამაკაცს დაესხა თავს.
ამჟამად მგლის მოკვლა საქართველოში აკრძალულია. მტაცებლებზე ნადირობა მხოლოდ უკიდურეს შემთხვევაშია დაშვებული – როდესაც ის ადამიანის სიცოცხლეს და შინაურ ცხოველებს ემუქრება. "პრობლემურ მგლებზე" სანადიროდ გარემოსა და ბუნებრივი რესურსების დაცვის სამინისტროს ბიომრავალფეროვნებისა და სატყეო პოლიტიკის დეპარტამენტის ნებართვაა საჭირო. შესაბამისი მიმართვა უწყებას გამგეობამ უნდა გაუგზავნოს.