თბილისი, 20 მაისი – Sputnik. ქალაქ რუსთავის შემოგარენში შუახნის მამაკაცს თავს მგელი დაესხა, იუწყება ადგილობრივი სააგენტო InfoRustavi.
რუსთავის ცენტრალური კლინიკის ექიმის ირაკლი ჯანგულაშვილის სიტყვებით, მამაკაცმა მათ დახმარებისთვის მომხდარიდან მხოლოდ ორი-სამი დღის შემდეგ მიმართა.
„იოდი წავუსვით და შეხვევა არ დასჭირვებია. ნაჩხაპნი ჰქონდა თათებით. ვერ გეტყვით, რატომ არ მოგვმართა მანამ", – განაცხადა ჯანგულაშვილმა.
ამჟამად მგლის მოკვლა საქართველოში აკრძალულია. მტაცებლებზე ნადირობა მხოლოდ უკიდურეს შემთხვევაშია დაშვებული – როდესაც ის ადამიანის სიცოცხლეს და შინაურ ცხოველებს ემუქრება. "პრობლემურ მგლებზე" სანადიროდ გარემოსა და ბუნებრივი რესურსების დაცვის სამინისტროს ბიომრავალფეროვნებისა და სატყეო პოლიტიკის დეპარტამენტის ნებართვაა საჭირო. შესაბამისი მიმართვა უწყებას გამგეობამ უნდა გაუგზავნოს.