თბილისი, 17 მაისი — Sputnik. მიწოდების სერვისი Glovo შეზღუდვით მუშაობს – კომპანიის კურიერების ნაწილი ამ დრომდე გაფიცულია.
კურიერები ბონუსების სისტემის ცვლილებას აპროტესტებენ. მათი თქმით, კომპანიამ ბონუსების სისტემა გააუქმა, რის შემდეგაც მათი შემოსავლები მნიშვნელოვნად შემცირდა.
„ბონუსებს საერთოდ ხსნიან, ასევე დაწიეს ის ტარიფები, რომლებიც ჩვენთვის მეტ-ნაკლებად მისაღები იყო. ჩვენ შეუძლებელს არაფერს ვითხოვთ. ჩვენი მოთხოვნაა ძველი ანაზღაურების დატოვება. იმ დრომდე გავაგრძელებთ აქციას, ვიდრე კომპანიის ხელმძღვანელობასთან გარკვეული კომპრომისი არ იქნება მიღწეული“, – განაცხადა აქციის ერთ-ერთმა მონაწილემ მიშა მამალაძემ.
აქციის მონაწილეთა განცხადებით, ისინი კომპანიასთან მოლაპარაკებებს რამდენიმე კვირაა უშედეგოდ აწარმოებენ.
კურიერების ინფორმაციით, პროტესტის გამოხატვის შემდეგ კომპანიამ Glovo-ს კურიერების ნაწილს კონტრაქტი საერთოდ შეუწყვიტა და ღამის საათებში გადაადგილების უფლება შეუზღუდა.
მიუხედავად ამისა, აქციის მონაწილეები აცხადებენ, რომ ისინი კომპანიისგან კომპრომისულ წინადადებებს ელოდებიან და პროტესტის შეწყვეტას არ აპირებენ.