თბილისი, 22 მარტი – Sputnik. საქართველოში Pfizer-ის შემოტანის შემდეგ მოქალაქეებს ექნებათ შესაძლებლობა, ვაქცინებს შორის არჩევანი თავად გააკეთონ, განაცხადა ჯანდაცვის მინისტრმა ეკატერინე ტიკარაძემ ბრიფინგზე.
ტიკარაძე: პროცესი დავაჩქარეთ, ვაქცინაციაში 65 წელს გადაცილებული ადამიანები უნდა ჩაერთონ>>
საქართველოში 15 მარტიდან კორონავირუსის საწინააღმდეგო ვაქცინაციის პირველი ეტაპი დაიწყო. ამ ეტაპზე იმუნიზაცია AstraZeneca-ს ვაქცინით ხორციელდება. დღეიდან კი საქართველოში კორონავირუსის საწინააღმდეგო კიდევ ერთ ვაქცინას – Pfizer-ს ელოდებიან.
„თანაბრობის პრინციპი იქნება ერთ-ერთი მთავარი ღირებულება, რომელიც ჯანდაცვის სფეროს აქვს. ყველა ვაქცინა იქნება ჩვენი მოსახლეობისთვის ხელმისაწვდომი. მოქალაქეებს ექნებათ შესაძლებლობა, ამოირჩიონ ვაქცინა“, – აღნიშნა ეკატერინე ტიკარაძემ.
ვაქცინის პირველი პარტია, შვედურ–ბრიტანული წარმოების AstraZeneca-ს 43,2 ათასი დოზა ქვეყანაში 13 მარტს ჩამოვიდა. საწყის ეტაპზე იმუნიზაციას მედპერსონალი (54 ათასი ადამიანი) ექვემდებარება.
როგორც დღეს გახდა ცნობილი, სამედიცინო პერსონალის შემდეგ ვაქცინაციის პროცესში 65 წელს გადაცილებული ადამიანები ჩაერთვებიან.
პრიორიტეტულია მოხუცთა თავშესაფრების ხანდაზმულების ჯგუფი და მათი მომვლელი პერსონალი – დაახლოებით 2000 ადამიანი. ასევე 75 წელს ზემოთ პირები, 65-დან 74 წლამდე პირები, შემდეგ – 55-დან 64 წლამდე პირები, ქრონიკული დაავადებების მქონე 18-დან 54 წლამდე პირები. ამის შემდეგ იგეგმება დანარჩენი მოსახლეობის ვაქცინაცია, მათ შორის მათი, ვინც ვირუსი უკვე გადაიტანა.
ქვეყანაში ვაქცინაცია ნებაყოფლობითია და სრულიად უფასოა.