თბილისი, 18 მარტი – Sputnik. ავსტრიის კანცლერმა სებასტიან კურცმა განაცხადა, რომ ევროპის პასუხისმგებლიანმა უწყებებმა რაც შეიძლება მალე უნდა გასცენ თანხმობა კორონავირუსის საწინააღმდეგო რუსული ვაქცინა „სპუტნიკ V“-ს გამოყენებასთან დაკავშირებით, იუწყება РИА Новости.
მანამდე რუსეთის პირდაპირი ინვესტიციების ფონდის დელეგაციამ ვენაში კურცთან მოლაპარაკებები გამართა, რომელზეც სხვა საკითხებთან ერთად რუსული ვაქცინის მიწოდების თემაც განიხილეს.
„რაც შეეხება „სპუტნიკ V"-ს და სხვა ვაქცინებს, კატეგორიულად მოვითხოვ, რომ ევროპაში პასუხისმგებლიანმა უწყებებმა რაც შეიძლება სწრაფად გასცენ ნებართვა ყველა უსაფრთხო ვაქცინის გამოყენებასთან დაკავშირებით. ჩვენს განკარგულებაში რაც უფრო მეტი ვაქცინა იქნება, მით უკეთესი“, – განაცხადა კურცმა ტელეკომპანია OE24-ის ეთერში.
ამასთან, კურცმა ავსტრიის შანსებს „სპუტნიკ V"-ს მიღების თაობაზე „სავსებით რეალური“ უწოდა.
„სპუტნიკ V“ 4 მარტიდან ევროპის წამლის სააგენტოში (ЕМА) ეტაპობრივი ექსპერტიზის პროცედურებს გადის. ადრე ЕМА-ში იმედი გამოთქვეს, რომ „სპუტნიკ V“-ს შეფასება დაჩქარებულ ვადებში მოხდება, თუმცა ვაქცინის დარეგისტრირება ჯერ არ მომხდარა.
EMA-ს მიერ პრეპარატის დარეგისტრირებამდე უნგრეთმა და სლოვაკეთმა უკვე გასცეს თანხმობა რუსული ვაქცინის ინდივიდუალური წესით გამოყენებაზე. რუსეთის პირდაპირი ინვესტიციების ფონდმა ევროკავშირის ტერიტორიაზე – იტალიაში ვაქცინის წარმოებაზე პირველი შეთანხმება შვეიცარულ კომპანია Adienne Pharma&Biotech-თან გააფორმა. იტალიაში რუსული ვაქცინის წარმოება ივლისში უნდა დაიწყოს – წლის ბოლომდე იგეგმება 10 მლნ-მდე დოზის წარმოება. ამას გარდა შვედეთი რუსულ ვაქცინას ივნისში მიიღებს.
დღეისათვის ევროკავშირის ბაზარზე ავტორიზებულია კორონავირუსის საწინააღმდეგო ოთხი ვაქცინა: Pfizer/BioNTech, Moderna, AstraZeneca და Johnson&Johnson. ბოლო კვირებში ევროკავშირი ვაქცინის მიწოდების კუთხით კომპანიების Pfizer/BioNTech-ის, Moderna-ს და AstraZeneca-ს მხრიდან რიგ პრობლემებს წააწყდა.
რუსეთის ჯანდაცვის სამინისტრომ „სპუტნიკ V“ 2020 წლის აგვისტოში დაარეგისტრირა. ვაქცინა გამალეის ცენტრში შემუშავდა.
სამეცნიერო ჟურნალმა The Lancet-მა გამოაქვეყნა ნაშრომი, რომელიც „სპუტნიკV“-ს კლინიკური კვლევების მესამე ფაზის შედეგებს ასახავს. ნაშრომის თანახმად, „სპუტნიკ V“-ს ეფექტურობა 91,6%-ს შეადგენს და ის იმუნოგენურობისა და უსაფრთხოების მაღალ დონეს ავლენს. ვაქცინა ახალი კორონავირუსული ინფექციით დაავადების მძიმე შემთხვევებისგან სრულ დაცვას უზრუნველყოფს.