თბილისი, 13 მაისი - Sputnik. 18 მაისიდან პოლონეთში სილამაზის სალონებისა და რესტორნების გახსნა იგეგმება. ამ დაწესებულებების მუშაობის განახლება ეპიდემიის საწინააღმდეგო შეზღუდვების გაუქმების პროგრამაში შედის. ამის შესახებ ქვეყნის პრემიერ-მინისტრმა მათეუშ მორავეცკიმ ოთხშაბათს გამართულ პრესკონფერენციაზე განაცხადა.
„18 მაისიდან კვლავ ამუშავდება კოსმეტიკური და საპარიკმახერო დაწესებულებები“, - განაცხადა პრემიერმა და ხაზი გაუსვა, რომ მუშაობის განახლებას ისინი მკაცრი სანიტარული ზომების დაცვის პირობით შეძლებენ.
„ნაწილობრივ გაიხსნება ასევე რესტორნები, ბარები, კაფეები, მაგრამ ასევე სანიტარული ნორმების დაცვის პირობით“, - დასძინა მან.
პოლონეთში COVID-19-ით ინფიცირებულთა რიცხვმა 17 062-ს მიაღწია, გარდაიცვალა 847 ადამიანი.
პოლონეთში პანდემიასთან დაკავშირებით ეპიდემიის რეჟიმი მოქმედებს: შეწყვეტილია საერთაშორისო საავიაციო და სარკინიგზო კავშირი, არ მუშაობენ ბაღები, სკოლები, უმაღლესი სასწავლებლები, გასართობი დაწესებულებები და საზოგადოებრივი კვების ობიექტები, საპარიკმახეროები და მანიკურის სალონები.
პოლონეთში თვენახევრიანი შესვენების შემდეგ 4 მაისიდან სავაჭრო ცენტრების გახსნა გადაწყდა.