თბილისი, 5 მაისი — Sputnik. ჩინეთი ახალი ციფრული ვალუტის ტესტირებას იწყებს, რაც მომავალში მას დოლარისგან „ჩახსნის“ შესაძლებლობას მისცემს, იუწყება РИА Новости.
გავრცელებული ინფორმაციით, ქვეყანამ ეს გადაწყვეტილება მას შემდეგ მიიღო, რაც აშშ-ის მხრიდან მასზე თავდასხმები გახშირდა. ირკვევა, რომ ამ გზით ჩინეთს საკუთარი სავალუტო სისტემის შექმნა სურს.
მიუხედავად იმისა, რომ ახალი კიბერვალუტის დანერგვის ოფიციალური გრაფიკი ჯერჯერობით არ არსებობს, ბოლო დროს ჩინეთის ცენტრალური ბანკი სულ უფრო აქტიურად მუშაობს ელექტრონული იუანის განვითარებაზე.
სავარაუდოდ, ელექტრონული იუანი იქნება პირველი ციფრული ვალუტა, რომელსაც სახელმწიფო შექმნის და მართავს, და არა კერძო კორპორაცია. ამასთან ის, კიბერვალუტების უმეტესობისგან განსხვავებით, გამჭვირვალე იქნება ეროვნული საგადასახადო სისტემისთვის.
გერმანიის მსგავსად: აშშ ჩინეთს კომპენსაციას მოსთხოვს კორონავირუსის გამო>>
ჩინური მასმედიის ინფორმაციით, სუვერენული კიბერვალუტის შემოღება სწორედ ახლაა მნიშვნელოვანი, ვინაიდან „დოლარი აშშ-ის საგარეო პოლიტიკის იარაღი ხდება“. ეს გამოიხატება როგორც ცალმხრივ სადამსჯელო სანქციებში, ისე კომპანიების SWIFT-ის სისტემიდან გათიშვის მუქარაში.