თბილისი, 24 აპრილი — Sputnik. საერთაშორისო კომპანია Group-IB, რომელიც კიბერშეტევების აღკვეთაზე სპეციალიზდება, მომხმარებლებს ურჩევს, უარი თქვან ვიდეოკონფერენციების სერვის Zoom-ზე და ისარგებლონ მისი ანალოგებით, ნათქვამია კომპანიის განცხადებაში.
„Zoom-ის შემქმნელებმა განაცხადეს, რომ ისინი სამი თვის განმავლობაში დაკავდებიან „ხვრელების შევსებით“. მაგრამ რისკების მინიმუმამდე დაყვანა უკვე ახლავეა საჭირო. ჩვენი რეკომენდაციაა - უარი თქვათ Zoom-ის გამოყენებაზე და გადახვიდეთ მის ანალოგებზე“, — ნათქვამია განცხადებაში.
Group-IB-ის ექსპერტები ასეთებად ასახელებენ: Google Meet-ს, GoToMeeting-ს ან სერვის WebEx-ს Cisco-სგან. ხოლო თუ კონფერენცვიდეოსოფტის სრული ფუნქციონალი არ გესაჭიროებათ და მხოლოდ ხმა არის საკმარისი, ისარგებლეთ Signal-ით.
იმ მომხმარებლებს კი, რომლებსაც ტექნიკური ან სხვა მიზეზების გამო არ შეუძლიათ Zoom-დან სხვა პროგრამებზე გადაერთონ, ექსპერტები ურჩევენ, გამოიყენონ ბრაუზერის ფანჯარა ვიდეოკონფერენციისთვის და არა თავად Zoom-ის პროგრამა, ვინაიდან სწორედ პროგრამა შეიცავს სახიფათო სისუსტეებს.
გარდა ამისა, ექსპერტების თქმით, Zoom-ით სარგებლობის შემთხვევაში აუცილებელია რამდენიმე პარამეტრის შესწორება:
- დაადეთ ზარს პაროლი (ეს ავტომატურად არ ხდება);
- დატოვეთ ჩართული ოპცია „ეკრანის ტრანსლაცია მხოლოდ წამყვანისთვის";
- გამორთეთ ოპციები: „გათიშულების ხელახლა ჩართვა“ და „წამყვანამდე ჩართვა“;
- გამორთეთ ფაილების გადაცემა.
Group-IB-ს ექსპერტები აცხადებენ, რომ Zoom-ის მისამართით სულ უფრო მეტი კრიტიკა ისმის უსაფრთხოების პრობლემებთან დაკავშირებით. მომხმარებლები ვიდეოჩანაწერებისა და პირადი ინფორმაციების გაჟონვას და Facebook-ზე გამოქვეყნებას უჩივიან. სერვისის გამოყენებაზე უკვე თქვეს უარი კომპანიამ Google, აშშ-ის სენატმა, გერმანიის საგარეო საქმეთა სამინისტრომ და ასევე რამდენიმე სხვა ქვეყნის თავდაცვისა და საგარეო საქმეთა სამინისტროებმა.