თბილისი, 18 აპრილი - Sputnik. საქართველოს მთავრობამ ხორბლის და პირველი ხარისხის ფქვილის იმპორტის სუბსიდირების სახელმწიფო პროგრამა დაამტკიცა, ნათქვამია მთავრობის დადგენილებაში.
ექსპერტი: საქართველო რუსეთისგან ხორბალს სტაბილურად ყიდულობს >>
პროგრამის მიზანია, რომელზეც 5,2 მილიონი ლარის დახარჯვა იგეგმება, არასაფურაჟე ხორბლისა და პირველი ხარისხის ხორბლის ფქვილზე არსებული საცალო სარეალიზაციო ფასის შენარჩუნებაა.
პროგრამის პირობების თანახმად, იმპორტიორი, რომელიც საქართველოში შემოიტანს არანაკლებ 2 000 და არაუმეტეს 40 000 ტონა მოცულობის ხორბალს, სახელმწიფოსგან ერთ ტონა ხორბალზე მიიღებს არაუმეტეს 40 აშშ დოლარის ეკვივალენტს ეროვნულ ვალუტაში.
აღნიშნული დადგენილებით, თითოეულ იმპორტიორთან გაფორმდება სპეციალური ხელშეკრულება, რომლის მიხედვითაც იქნება შესაძლებელი სუბსიდიის მიღება. პროგრამის ფარგლებში განხორციელდება ჯამში არაუმეტეს 40 000 ტონა ხორბლის იმპორტის სუბსიდირება.
იმპორტიორი ვალდებულია, პირველი ხარისხის ფქვილის რეალიზაცია განახორციელოს ერთ 50 კგ-იან ტომარაზე არაუმეტეს 51 ლარად, სუბსიდირების ხელშეკრულების გაფორმების თარიღიდან არაუგვიანეს მომდევნო სამი თვის განმავლობაში.
დადგენილი ფასის გაზრდის სანაცვლოდ იმპორტიორს მოუწევს სუბსიდიის დაბრუნება და არანაკლებ 50 000 ლარის ოდენობის პირგასამტეხლოს გადახდა.
სუბსიდიის მიღების მსურველ იმპორტიორთა განაცხადების მიღება 20 მაისს დასრულდება.
დღეისათვის მსოფლიოში ერთი ტონა ხორბლის ფასი 213-დან 250 დოლარამდე მერყეობს. კორონავირუსის პანდემიის ფონზე ექსპერტები ფასების ზრდას და მთელი რიგი ქვეყნების მხრიდან ხორბლის ექსპორტზე შეზღუდვებს ელოდებიან.