თბილისი, 17 აპრილი - Sputnik. წყნეთის ტაძარი დაიკეტა, რადგან მრევლის ერთ-ერთ წევრს კორონავირუსი დაუდასტურდა, იუწყება ტელეკომპანია „იმედი“.
საქართველოში კორონავირუსით ინფიცირებულთა რიცხვი 370-მდე გაიზარდა>>
ტელეარხის ცნობით, დაავადებული საპატრიარქოს წმინდა იოაკიმესა და ანას სამედიცინო ცენტრის თანამშრომელია, ასევე ცნობილია, რომ ის ხარების დღესასწაულზე ტაძარში იმყოფებოდა და აღსარებაც ჩააბარა.
ამ დროისათვის ტაძრის სასულიერო პირები კარანტინში იმყოფებიან.
საქართველოში, მიუხედავად მთელ მსოფლიოში კორონავირუსის პანდემიის მძვინვარებისა, ღვთისმსახურება გრძელდება. საპატრიარქომ უფრო ადრე განაცხადა, რომ აღდგომასთან დაკავშირებული ყველა ღვთისმსახურება დაავადებათა კონტროლის ეროვნული ცენტრის რეკომენდაციების შესაბამისად ჩატარდება.
რამდენიმე დღის წინ კორონავირუსი თბილისის ერთ-ერთი ტაძრის მღვდელმსახურს დაუდასტურდა.
საქართველოში კორონავირუსით ინფიცირებულთა რაოდენობა ამ დროისთვის 370-მდე გაიზარდა, აქედან გამოჯანმრთელდა 77 ადამიანი, გარდაიცვალა – 3, კარანტინის რეჟიმში იმყოფება 5079, ხოლო სტაციონარებში დაკვირვების ქვეშ 558 პაციენტია.