თბილისი, 14 აპრილი - Sputnik. საზღვარგარეთ კორონავირუსით საქართველოს 92 მოქალაქის ინფიცირების, ხოლო გარდაცვალების ცხრა შემთხვევაა დაფიქსირებული, განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ.
14 აპრილის მონაცემებით, საქართველოში ახალი კორონავირუსით ინფიცირებულთა რიცხვი 296-მდე გაიზარდა. აქედან გამოჯანმრთელდა 69 ადამიანი, გარდაიცვალა – 3 პაციენტი. კარანტინის რეჟიმში იმყოფება 4856, ხოლო სტაციონარებში დაკვირვების ქვეშ 458 პაციენტია. ასევე უცხოეთიდან სამკურნალოდ სამშობლოში გადმოყვანილია კორონავირუსით ინფიცირებული საქართველოს სამი მოქალაქე.
გამყრელიძის განცხადებით, დაავადებათა კონტროლის ეროვნულ ცენტრს ინფორმაცია საგარეო საქმეთა სამინისტროდან ყოველდღიურად მიეწოდება.
„საქართველოს კორონავირუსთან ბრძოლისას აქვს წარმატებებიც. გამოჯანმრთელდა 69 ადამიანი, მაგრამ ამავდროულად გვაქვს სამი სიკვდილი. ვერ მოვუარეთ იმ ხანდაზმულებს, იქ იყო ძალიან მძიმე თანმხლები დაავადებები. სამწუხაროდ გვაქვს საზღვარგარეთ ჩვენს თანამემამულეებში ინფიცირების 92 შემთხვევა. ამ ინფორმაციას ჩვენ საგარეო საქმეთა სამინისტროდან ყოველდღიურად ვიღებთ. სამწუხაროდ, არის ცხრა გარდაცვლილი“, – განაცხადა ამირან გამყრელიძემ.
საგარეო საქმეთა სამინისტრო ვერ ახორციელებს უცხოეთიდან გარდაცვლილი თანამემამულეების ცხედრების გადმოსვენების პროცედურას. ჯანმოს ეს მოთხოვნა ყველა ქვეყანას ეხება.
საქართველოში კორონავირუსით ინფიცირების პირველი შემთხვევა 26 თებერვალს დაფიქსირდა. მარტის ბოლოსთვის კი ხელისუფლებამ ქვეყნის მთელ ტერიტორიაზე საგანგებო მდგომარეობა გამოაცხადა.