თბილისი, 10 აპრილი - Sputnik. ბორჯომში ცხოველის მიმართ სასტიკი მოპყრობის ფაქტზე დაკავებულ პირს ახალციხის რაიონულმა პროკურატურამ ბრალი წარუდგინა, ნათქვამია საქართველოს პროკურატურის მიერ გავრცელებულ განცხადებაში.
შინაური ცხოველების შესახებ კანონის გამკაცრებას ვეტერინარი მიესალმება>>
უწყების ცნობით, მთვრალ მდგომარეობაში მყოფმა ბრალდებულმა 6 აპრილს ბორჯომში მდებარე ერთ-ერთი საცხოვრებელი კორპუსის მე-12 სართულიდან ძაღლი გადააგდო. ცხოველმა სხვადასხვა სახის დაზიანება მიიღო.
ბრალდებული სამართალდამცველებმა 8 აპრილს დააკავეს. მას ბრალდება საქართველოს სსკ-ის 259-ე მუხლით წარედგინა, რაც ითვალისწინებს ცხოველისადმი სასტიკ მოპყრობას, რამაც მისი დასახიჩრება გამოიწვია.
უწყების ცნობით, პროკურატურამ სასამართლოს შუამდგომლობით მიმართა და ბრალდებულისთვის აღკვეთის ღონისძიების სახით 5000-ლარიანი საპატიმრო გირაოს შეფარდება მოითხოვა.
„სასამართლომ ნაწილობრივ დააკმაყოფილა ბრალდების მხარის შუამდგომლობა და ბრალდებულს აღკვეთის ღონისძიების სახით შეეფარდა - ხელწერილი გაუსვლელობისა და სათანადო ქცევის შესახებ“, -აღნიშნულია განცხადებაში.
ბრალდებულის მიმართ წარდგენილი ბრალდება სასჯელის სახით ერთ წლამდე თავისუფლების აღკვეთას ითვალისწინებს.
საქართველოში ძაღლებისა და კატების უგულო მეპატრონეებს დააჯარიმებენ>>
მასმედიაში გავრცელებული ინფორმაციით, სტუმრად მყოფმა ახალგაზრდა მამაკაცმა მასპინძლის მეზობელთან შეკამათების შემდეგ მისი ძაღლი გადმოაგდო. ძაღლი მაკედ იყო. მას ლეკვები დაეხოცა, თვითონ კი მრავლობითი მოტეხილობითა და შიდა სისხლდენით მძიმე მდგომარეობაშია.