თბილისი, 31 მარტი – Sputnik. საქართველოს მთავრობის გადაწყვეტილებით, თუ 16 წლამდე ასაკის ბავშვი საგანგებო მდგომარეობით დადგენილ წესებს დაარღვევს, ჯარიმის გადახდა მშობლებს მოუწევთ.
საგანგებო მდგომარეობა საქართველოში: ბოლო 24 საათში რეჟიმის დარღვევის 46 ფაქტი გამოვლინდა>>
საქართველოში კორონავირუსის საფრთხის გამო საგანგებო მდგომარეობა 21 მარტიდან მოქმედებს. მაშინვე დაწესდა ჯარიმებიც წესების დამრღვევებისთვის 3 ათასი ლარი ოდენობით. 10 დღის შემდეგ მთავრობამ შეზღუდვების გამკაცრების გადაწყვეტილება მიიღო.
უკვე 31 მარტიდან, მთავრობის გადაწყვეტილებით, თუ 16 წლამდე ასაკის ბავშვი საგანგებო მდგომარეობით დადგენილ წესებს დაარღვევს, ჯარიმის გადახდა მშობლებს მოუწევთ.
როგორც მთავრობის ადმინისტრაციის უფროსმა ხატია მეზვრიშვილმა განმარტა, არასრულწლოვანთა შეზღუდვები ეხება ასევე ავტომობილებით მგზავრობასაც.
„უნდა გადავადგილდეთ და ისე უნდა დავგეგმოთ ეს პროცესი, რომ მანქანაში სამზე მეტი ადამიანი არ იჯდეს მძღოლის ჩათვლით. საუბარია ნებისმიერი ასაკის ბავშვზე“, – განაცხადა მეზვრიშვილმა.
ამ მხრივ შეღავათი არ იქნება არც მრავალშვილიანი ოჯახებისთვის, აღნიშნა მეზვრიშვილმა.
საგანგებო მდგომარეობის პირობებში საქართველოში აკრძალულია სამ ადამიანზე მეტის შეკრება ნებისმიერ ადგილზე, გარდა მაღაზიებისა და აფთიაქებისა. აქაც აუცილებლად უნდა იყოს დაცული ორმეტრიანი დისტანცია. შეზღუდვები ეხება როგორც მოზრდილებს, ისე ბავშვებს.
ამასთან, ქვეყანაში 21:00-დან 06:00 საათამდე მოქმედებს კომენდანტის საათი. ამ დროს იკრძალება როგორც ავტომობილების, ისე ქვეითად მოსიარულეების გადაადგილება.
საქართველოში კორონავირუსით ინფიცირებულთა რაოდენობა 110-მდე გაიზარდა>>
როდესაც კომენდანტის საათი არ მოქმედებს, მოქალაქეებს აუცილებლობის შემთხვევაში შეუძლიათ ახლომდებარე მაღაზიასა და აფთიაქში გასვლა, მხოლოდ თან უნდა იქონიონ პირადობის დამადასტურებელი მოწმობა.