თბილისი, 29 მარტი — Sputnik. ფოთისა და ხობის მიტროპოლიტმა, მეუფე გრიგოლმა გვიან ღამით ფოთის საკათედრო ტაძარში წირვაზე აღნიშნა, რომ საგანგებო მდგომარეობამ შესაძლოა, საგანგებო რეჟიმში ჩააყენოს ეკლესიაც, იუწყება საზოგადოებრივი მაუწყებლის პირველი არხი.
საპატრიარქოში განმარტავენ, სინოდი ეთანხმება იმას, რომ მორწმუნეებმა დაავადებათა კონტროლის ეროვნული ცენტრის რეკომენდაციები უნდა დაიცვან. თუმცაღა, საგანგებო მდგომარეობის პერიოდში, რომელიც დიდმარხვას ემთხვევა, რამდენიმე მნიშვნელოვანი დღესასწაული იქნება და მორწმუნეებისათვის წირვაზე დასწრება ძალიან მნიშვნელოვანია.
მეუფე გრიგოლის განცხადებით, საგანგებო მდგომარეობა არ ნიშნავს, რომ ეკლესიაში ღვთისმსახურება შეწყდება. მისი განმარტებით, შეიძლება ადამიანებმა ეკლესიაში მისვლა ვერ შეძლონ არა იმის გამო, რომ ვინმე უკრძალავთ, არამედ ღვთის გამო, დაიცვან საკუთარი თავიც და სხვაც.
„ზიარებაზე განსხვავებული აზრი არსებობს სასულიერო პირებს შორისაც. ეს საკითხი ცალკეულად ვერ გადაწყდება. სინოდზე უნდა გადაწყდეს. ჩვენ ამ განსაცდელმა უნდა დაგვაახლოვოს ერთმანეთთან და არა პირიქით“, – აღნიშნა მეუფე გრიგოლმა.
მისივე თქმით, პრობლემები, რაც არის საქართველოში, შესაძლოა, იოლად გამოიყურებოდეს, მაგრამ ეს ვერ შეგვიშლის ხელს საფრთხეების სწორად გააზრებაში და კარგი იქნება, ეს საფრთხეები უმსხვერპლოდ გადავლახოთ.
ამჟამად საზოგადოებრივი მაუწყებლის პირველი არხის პირდაპირ ეთერში სამების საკათედრო ტაძრიდან მიმდინარეობს წირვის ტრანსლაცია. მორწმუნეები ესწრებიან წირვას, იცავენ დისტანციას, თუმცა პირბადე არავის უკეთია.
საქართველოს სომეხთა ეპარქია საქართველოში გამოცხადებული საგანგებო მდგომარეობისა და დაწესებული შეზღუდვებიდან გამომდინარე სასულიერო რიტუალებსა და ცერემონიებს შეცვლილი ფორმატით ჩაატარებს. ეკლესიაში ბზობის, ვნების კვირის მნიშვნელობისა და იესო ქრისტეს ბრწყინვალე აღდგომისადმი მიძღვნილი ცერემონიები დახურულ კარს მიღმა ჩატარდება. მრევლს შეეძლება წირვას ეკლესიის მიმდებარე ტერიტორიაზე დამონტაჟებული დინამიკების საშუალებით მოუსმინოს ან უყუროს ონლაინ, პირდაპირი ტრანსლაციით.
ანალოგიური გადაწყვეტილება მიიღეს დღეს საქართველოს მართლმადიდებელი ეკლესიის დასავლეთ ევროპის ეპარქიაში.
რაც შეეხება საქართველოს საპატრიარქოს, იქ აცხადებენ, რომ ზიარების წესი არ შეიცვლება და ეკლესია ცდილობს მაქსიმალურად დაიცვას სახელმწიფოს და, მათ შორის, დაავადებათა კონტროლის ეროვნული ცენტრის მიერ დადგენილი უსაფრთხოების ზომები.
29 მარტის დილის მონაცემებით, საქართველოში კორონავირუსით ინფიცირებულთა რაოდენობამ ამ დროისათვის 90 ადამიანს მიაღწია. მათ შორის გამოჯანმრთელებულია 16. საკარანტინო სივრცეში იმყოფება 4695, სტაციონარში მეთვალყურეობის ქვეშ კი 231 ადამიანია.