თბილისი, 14 მარტი – Sputnik. ესპანეთში და კერძოდ, მადრიდში მცხოვრებ საქართველოს მოქალაქეს კორონავირუსი დაუდასტურდა, იუწყება ტელეკომპანია „იმედი“ საქართველოს საგარეო უწყებაზე დაყრდობით.
როგორც ტელეარხს საგარეო საქმეთა სამინისტროში განუცხადეს, დაინფიცირებული პირი ამავდროულად ონკოლოგიური პაციენტია, რომელსაც თან ახლავს ოჯახი წევრი. ის ამჟამად იზოლაციაში იმყოფება.
„გიდასტურებთ, რომ მადრიდში კორონავირუსით დაინფიცირებულია საქართველოს ერთი მოქალაქე... ის მოთავსებულია კლინიკაში და შესაბამისად მკურნალობს... საკონსულო მუდმივ კავშირზეა ოჯახთან და კლინიკასთან“, - აღნიშნეს საგარეო უწყებაში.
ჯონ ჰოპკინსის უნივერსიტეტის სპეციალური პროექტის ინფორმაციით, ამ დროისათვის მსოფლიოს 139 ქვეყანაში დადასტურებულია COVID 19-ის 145 374 შემთხვევა. აქედან გარდაიცვალა 5 429, ხოლო განიკურნა 71 694 პაციენტი.
საქართველოს მთავრობის სპეციალურ ვებ–გვერდზე განთავსებული ჯანდაცვის მსოფლიო ორგანიზაციის მონაცემებით, ესპანეთში ამ დროისთვის კორონავირუსით 6 023 დაინფიცირებულია.
COVID 19 განკურნებულ პაციენტებში მძიმე კვალს ტოვებს: ჩინელი მედიკოსების უახლესი დასკვნა>>
14 მარტის მონაცემებით, საქართველოში კორონავირუსით ინფიცირებულთა რაოდენობამ 30 ადამიანს მიაღწია, კარანტინის რეჟიმშია 418, ხოლო სტაციონარში მეთვალყურეობის ქვეშ - 54 ადამიანი.