თბილისი, 6 მარტი — Sputnik. საქართველოს საგარეო საქმეთა სამინისტროს გადაწყვეტილებით, ქვეყნის ყველა დიპლომატიურ წარმომადგენლობასა და საკონსულოში, რომლებიც კორონავირუსის აქტიური გავრცელების ზონებშია, დამატებით ამოქმედდება „ცხელი ხაზის“ ახალი ნომრები. თვითონ საელჩოები მუშაობას საგანგებო რეჟიმში გააგრძელებენ. ამის შესახებ აღნიშნულია საქართველოს საგარეო უწყების განცხადებაში.
იტალიაში ინფიცირების შემთხვევებისა და საქართველოს მოქალაქეების მიმართვიანობის გაზრდასთან დაკავშირებით საქართველოს საელჩოს რომის საკონსულო სამსახურში უკვე ამოქმედდა „ცხელი ხაზის“ დამატებითი ახალი ნომრები: (+39 33) 3887-91-23; (+39 35) 0131-21-31; (+39 35) 0148-31-14.
საელჩო განაგრძობს მუდმივ კომუნიკაციას იტალიაში მყოფ საქართველოს მოქალაქეებთან, და ძალზე მნიშვნელოვანია, რომ ისინი დაემორჩილონ ადგილობრივი ხელისუფლების მითითებებსა და რეკომენდაციებს, ნათქვამია საგარეო უწყების განცხადებაში.
ამავე დროს, საგარეო საქმეთა სამინისტრო თანამემამულეებს მოუწოდებს, თავი შეიკავონ იტალიაში წასვლისგან.
საქართველოში, 6 მარტის მდგომარეობით, დაფიქსირებულია კორონავირუსით ინფიცირების ცხრა შემთხვევა. აქედან შვიდი ადამიანი იტალიაში იმყოფებოდა, ხოლო ორი – ირანში.
ამ დროისათვის ახალი ტიპის კორონავირუსი COVID-19 უკვე მსოფლიოს 76 ქვეყანაშია გამოვლენილი. აღსანიშნავია, რომ ბოლო 48 საათის განმავლობაში ეპიდემია 12 ქვეყანაში დაფიქსირდა.
ინფიცირების საერთო რაოდენობა მსოფლიოს მასშტაბით ამ დროისათვის 98 385 კაცს შეადგენს. აქედან 80 555 მატერიკულ ჩინეთზე მოდის, 6 284 — სამხრეთ კორეაზე, 3 858 იტალიაზე, 3 513 — ირანზე, ხოლო დანარჩენი 696 შემთხვევა სხვადასხვა ქვეყნებშია გამოვლენილი. სულ გარდაიცვალა 3 383 კაცი, გამოჯანმრთელდა და საავადმყოფოებიდან გაეწერა 55 423 პაციენტი.