თბილისი, 27 დეკემბერი – Sputnik. საქართველოს პრეზიდენტმა სალომე ზურაბიშვილმა ალმათში პარასკევს, 27 დეკემბერს დილით მომხდარი ავიაატასტროფის შედეგად დაღუპულთა ოჯახებს მიუსამძიმრა.
ყაზახეთში სამგზავრო თვითმფრინავი ჩამოვარდა: არის მსხვერპლი – ვიდეო შემთხვევის ადგილიდან>>
ავიაკატასტროფა ადგილობრივი დროით 07:22 საათზე მოხდა. თვითმფრინავმა, რომელიც ქალაქ ნურ-სულტანის მიმართულებით მიფრინავდა, აფრენისას სიმაღლე დაკარგა და მიწაზე ორსართულიან ბეტონის ნაგებობას შეეჯახა. თვითმფრინავში 98 ადამიანი იმყოფებოდა, მათ შორის ხუთი – ეკიპაჟის წევრი. დაიღუპა 12 ადამიანი.
„ყაზახეთში მომხდარი ავიაკატასტროფა ნამდვილი ტრაგედიაა. ვგლოვობთ ადამიანების დაღუპვას და ვუსამძიმრებთ დაღუპულთა ოჯახებს. ამ მძიმე დროს საქართველო მხარს უჭერს ყაზახ ხალხს“, – დაწერა პრეზიდენტმა Twitter–ში.
ავიაკატასტროფის შედეგად დაშავდა 49 ადამიანი, მათ შორის რვა ბავშვი.
შემთხვევის გამოძიებაში მონაწილეობას მიიღებენ საერთაშორისო საავიაციო კომიტეტი და მწარმოებელი ქარხნის წარმომადგენელი ნიდერლანდებიდან.