თბილისი, 18 ოქტომბერი — Sputnik. შვიდი წლის გოგონას დედა, რომლის მიერ გავრცელებულ ვიდეოს სკანდალი მოჰყვა, სოციალურ ქსელში იმ ადმიანებს მიმართავს, ვინც ბავშვი და მისი მშობლები სექსუალური ჩაცმისა და ბავშვისთვის შეუფერებელი ქმედებების გამო გააკრიტიკა.
მისი თქმით, არავისი საქმე არაა, როგორ მოეპყრობა საკუთარ შვილს.
„უმაკიაჟოადაც ბრილიანტი მყავს. აი, თქვენ კი თქვენს ნაკლს ვერ ხედავთ და სხვას აკრიტიკებთ. ჩემი შვილის ჩაცმა-გამოპრანჭვას თქვენ ნამდვილად არ შეგეკითხებით. თქვენ მაგაზე არ იდარდოთ, თქვენს თავს მიხედეთ. ის კი ნამდვილად ვიცი, თქვენნაირ სულით მახინჯ ადამიანად ნამდვილად არ აღვზრდი. მადლობა ყურადღებისათვის“, – წერს ქალბატონი.
გოგონა, რომლის დედასაც საკუთარ პირად გვერდზე შვილის ფოტოები უდევს, მონაწილეობას სოციალური ქსელის ერთ-ერთ კონკურსში იღებდა. რამდენიმე დღის წინ გავრცელდა ქორწილში გადაღებული ვიდეო, სადაც გოგონა ცეკვავს, აცვია ძალიან მოკლე კაბა, აქვს მაკიაჟი და ვულგარული მოძრაობებით გამოირჩევა. უფლებადამცველი ბაია პატარაია აღნიშნულ ვიდეოს სოციალურ ქსელში ეხმაურება და აცხადებს, რომ ფაქტთან დაკავშირებით შინაგან საქმეთა სამინისტროს უკვე მიმართა.