თბილისი, 20 მაისი — Sputnik. იტალიის ქალაქ ტრენტოში მდებარე ტბაში ახალგაზრდა ქართველი ემიგრანტი თამარ ნეფარიძე გარდაცვლილი იპოვეს, იუწყება ქართული მასმედია.
გავრცელებული ინფორმაციით, ქალს ახლობლები ორი დღის განმავლობაში ეძებდნენ.
„გარდაიცვალა ემიგრანტი იტალიაში. შემზარავი ამბავი გავიგეთ. თამარ, ეს რა გააკეთე?! შენმა ვაჟკაცმა შვილმა ლაშამ დაბადების დღე როგორი სიტყვებით მოგილოცა და ეს რა საჩუქარი გაუკეთე?! ნუთუ სულ არ შეგეცოდა... ნეტავი გეთქვა რაიმე შენი შვილისთვის, თუ გიჭირდა.... ტბაში იპოვეს შენი გაყინული სხეული. რატომ აარჩიე შენი დაბადების დღე, რატომ?!“ – წერს სოციალურ ქსელში ნეფარიძის ახლობელი შოთო სიხარულიძე.
როგორც გარდაცვლილის შვილმა ლაშა ჟორჟოლიანმა განუცხადა მასმედიას, მომხდარის დეტალებს მას შემდეგ გაარკვევს, რაც იტალიაში ჩავა. ის ტრენტოში დღეს მიფრინავს.
ამ დროისთვის უცნობია, როდის ჩამოასვენებენ გარდაცვლილს სამშობლოში.