თბილისი, 7 მაისი – Sputnik. საქართველოს საელჩოებში 2020 წლიდან ეკონომიკური დესპანები იმუშავებენ, ნათქვამია საქართველოს პარლამენტის ვებ-გვერდზე გავრცელებულ ინფორმაციაში.
საქართველოს დიპლომატიურ წარმომადგენლობებში ეკონომიკური მიმართულების დესპანების მივლინების შესახებ საგარეო ურთიერთობათა კომიტეტის წევრებს ინფორმაცია დღეს საქართველოს საგარეო საქმეთა მინისტრის მოადგილე ალექსანდრე ღვთისიაშვილმა მიაწოდა.
მისი განცხადებით, ეს კიდევ უფრო მეტად შეუწყობს ხელს ადგილობრივი ბიზნესისთვის საქართველოში არსებული ეკონომიკური და ბიზნესშესაძლებლობების შესახებ ინფორმაციის მიწოდებას.
სამინისტროს მიერ განსაზღვრულია იმ ქვეყნების სია, სადაც ეკონომიკური მიმართულების დესპანები პირველი ეტაპისთვის მუშაობას შეუდგებიან. ესენია: ამერიკის შეერთებული შტატები, ბრიტანეთის გაერთიანებული სამეფო, გერმანია, თურქეთი, არაბთა გაერთიანებული საემიროები, ჩინეთი და იაპონია.
მინისტრის მოადგილის თქმით, აღნიშნული მიმართულებით ცვლილებათა საკანომდებლო პაკეტი უკვე მომზადებულია და უახლოეს პერიოდში წარედგინება პარლამენტს განსახილველად.
საზოგადოებრივი მაუწყებლის პირველი არხის ცნობით, საგარეო უწყებამ დესპანების შესარჩევი კონკურსი უკვე გამოაცხადა და შვიდი ადგილისთვის ამ დროისთვის 50 ადამიანი იბრძვის.
შერჩეულ კანდიდატებს გაესაუბრებიან საგარეო უწყებაში შექმნილი კომისიის წევრები, რომლის შემადგენლობაში ბიზნესსექტორის წარმომადგენელიც შევლენ.
კანდიდატების შერჩევის პროცესი შემოდგომისთვის უნდა დასრულდეს.
მინისტრის მოადგილის თქმით, ამ დროისთვის საქართველოს ყველა საელჩოში გამოყოფილია თითო ადამიანი, რომელიც პასუხისმგებელია ეკონომიკურ მიმართულებაზე, მათ აქვთ კონკრეტული გეგმა და მუშაობენ ქვეყნის პოპულარიზაციისთვის. საპილოტე პროექტი ითვალისწინებს იმას, რომ მომავალში კომერციულ ატაშეებს ეკონომიკური დესპანები ჩაანაცვლებენ.
კომერციული ატაშეების მისიაა ექსპორტის წახალისება, ქართველი ექსპორტიორების უფლებების დაცვა, ინვესტიციების მოზიდვა და საქართველოში თანამედროვე ტექნოლოგიების შემოტანა.