თბილისი, 15 აპრილი — Sputnik. საქართველოში ტურიზმის განვითარებასთან ერთად იზრდება მოთხოვნა ქვეყანაში ავიაფრენებზე – ქვეყანაში ყველაზე დიდი მოთხოვნაა დაბალბიუჯეტიან ავიაკომპანია Wizz Air-ზე, რომელიც რეისებს ქუთაისის საერთაშორისო აეროპორტიდან ასრულებს, ნათქვამია საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს განცხადებაში.
ლოუკოსტერის მომსახურებით 2019 წლის იანვარ-მარტში დაახლოებით 152,7 ათასმა მგზავრმა ისარგებლა.
ახალი ქართული ავიაკომპანია მოსკოვში ფრენებს განახორციელებს>>
ლიდერთა ხუთეულში ასევე შედიან Turkish Airlines, Georgian Airways, Pobeda Airlines და Ural Airlines.
ავიაგადამზიდავების ტოპ-ხუთეული საქართველოში 2019 წლის პირველ კვარტალში
| ავიაკომპანია | მგზავრთა რაოდენობა | წილი ბაზარზე % |
| Wizz Air | 152 697 | 15 |
| Turkish Airlines | 110 962 | 11 |
| Georgian Airways | 99 324 | 11 |
| Pobeda Airlines | 96 546 | 10 |
| Ural Airlines | 60 507 | 6 |
მთლიანობაში, საქართველოს საერთაშორისო აეროპორტებით 2019 წლის პირველ კვარტალში ისარგებლა მილიონზე მეტმა ადამიანმა, რაც გასული წლის მაჩვენებელზე 21%-ით მეტი იყო.
მგზავრთა რაოდენობასთან ერთად იზრდება ასევე იმ ავიაკომპანიების რაოდენობა, რომლებიც რეგულარულად ფრენენ საქართველოში. მათი რაოდენობა 2018 წელს 53-დან 58-მდე გაიზარდა.
ნოვოსიბირსკსა და ბათუმს პირდაპირი ავიარეისები დააკავშირებს>>
საქართველოს აეროპორტებში 2019 წლის პირველ კვარტალში განხორციელდა 5,2 ათასი სამგზავრო და სატვირთო რეისი, რაც გასული წლის ანალოგიური პერიოდის მაჩვენებელზე 24%-ით მეტია. აქედან 4 640 რეისი იყო რეგულარული, ხოლო 560 – ჩარტერული.