თბილისი, 8 მარტი — Sputnik. საქართველოს ტურისტულ პოტენციალს მსოფლიოს სხვადასხვა ქვეყნის ათობით მინისტრი გაეცნობა, განაცხადა მსოფლიო ტურისტული ორგანიზაციის გენერალურმა მდივანმა ზურაბ პოლოლიკაშვილმა.
ამის შესახებ მსოფლიო ტურისტული ორგანიზაციის გენერალურმა მდივანმა საქართველოს ტურიზმის ეროვნული ადმინისტრაციის ახალ უფროსთან მარიამ ქვრივიშვილთან შეხვედრის შემდეგ განაცხადა, რომელიც ბერლინში 53-ე საერთაშორისო ტურისტული გამოფენის ITB Berlin 2019-ის ფარგლებში გაიმართა.
„ივნისში საქართველოში მსოფლიოს რამდენიმე ქვეყნის ათობით მინისტრის 2-3-დღიანი ვიზიტიება დაგეგმილი. ვფიქრობ, რომ ეს კარგი შესაძლებლობა იქნება, რათა ისინი ადგილზე გაეცნონ ჩვენი ქვეყნის ტურისტულ პოტენციალს და ტურისტულ შესაძლებლობებს არა მარტო ტურისტების, არამედ ინვესტიციების მოზიდვის კუთხით“, – განაცხადა პოლოლიკაშვილმა.
საქართველოში ტურიზმის სფერო რამდენიმე წელია აქტიურად ვითარდება, რაც სტატიტიკურ მონაცემებშიც აისახება.
ქვეყანაში ყოველწლიურად ახალი სასტუმროები ჩნდება, ხორციელდება კვების ობიექტების ხარისხის კონტროლი, ხდება გიდებისა და მომსახურე პერსონალის გადამზადება.