თბილისი, 27 იანვარი - Sputnik. მცხეთა–სტეფანწმინდა–ლარსის საავტომობილო გზის კობი–გუდაურის მონაკვეთზე ინტენსიური თოვლის გამო მსუბუქი ავტომანქანების მოძრაობა განსაკუთრებული სიფრთხილით ხორციელდება, აღნიშნულია საქართველოს საპატრულო პოლიციის მიერ გავრცელებულ განცხადებაში.
გუდაური–კობის მონაკვეთზე ავტოტრანსპორტის მოძრაობაზე შეზღუდვები თოვლისა და ლიპყინულის გამო დღეს დაწესდა.
საპატრულო პოლიციის რეკომენდაციით, გზის აღნიშნულ მონაკვეთზე გადაადგილება რეკომენდებულია ზამთრის საბურავებით და დაბალი სიჩქარით.
საპატრულო პოლიცია მოქალაქეებს მოუწოდებს, დაემორჩილონ სამართალდამცველების მითითებებს და მაქსიმალურად დაიცვან საგზაო მოძრაობის წესები.
ამ დროისთვის, თოვლისა და ლიპყინულის გამო, გუდაური(ფოსტა)-კობის მონაკვეთზე აკრძალულია მისაბმელიანი და ნახევრადმისაბმელიანი ავტოტრანსპორტის მოძრაობა, ხოლო დანარჩენი სახის ავტოტრანსპორტის მოძრაობა თავისუფალია. აღნიშნული გზის მონაკვეთზე მოძრაობა განხორციელდება გაუჩერებლად გავლის რეჟიმში, მხოლოდ ზვავდამცავი გვირაბების გავლით.
საავტომობილო გზების დეპარტამენტის ცნობით, მლეთა–გუდაურის (სოფ. ქვემო მლეთადან ს/გზის 85-ე კმ მონაკვეთამდე) მონაკვეთზე ავტოტრანსპორტის მოძრაობა განხორციელდება გაუჩერებლად გავლის რეჟიმში.
აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობითა და კოორდინაციით.