თბილისი, 15 იანვარი - Sputnik. სომხეთის პრემიერ-მინისტრი ნიკოლ ფაშინიანი დანიშვნიდან მეორე დღეს საქართველოს არაოფიციალურად ეწვია და თავის ქართველ კოლეგას, მამუკა ბახტაძეს შეხვდა, ნათქვამია მთავრობის მეთაურის ვებგვერდზე გავრცელებულ განცხადებაში.
ფაშინიანი სომხეთის პრემიერ-მინისტრად მეორედ 14 იანვარს დაინიშნა. შესაბამის ბრძანებულებას ქვეყნის პრეზიდენტმა არმენ სარქისიანმა მოაწერა ხელი.
საქართველოს პრემიერ-მინისტრის პრეს-სამსახურის მონაცემებით, ორი ქვეყნის მთავრობების მეთაურების არაოფიციალური შეხვედრა ბოლნისში გაიმართა.
ბახტაძემ ფაშინიანს დანიშვნა პირადად მიულოცა. საქართველოს და სომხეთის პრემიერ-მინისტრებმა ორმხრივი ურთიერთობები განიხილეს და ნაყოფიერი თანამშრომლობის გაგრძელების იმედი გამოთქვეს.
შეგახსენებთ, რომ საქართველოს პრემიერ-მინისტრ მამუკა ბახტაძის ოფიციალური ვიზიტი ერევანში 10 სექტემბერს შედგა. მანამდე, 30 მაისს პირველი ოფიციალური ვიზიტით თბილისს ფაშინიანი ეწვია.