თბილისი, 10 ნოემბერი — Sputnik. საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო, დევნილი ოჯახების განსახლების მიზნით, მენაშენეებისგან 400 ბინას შეისყიდის, ნათქვამია უწყების ვებგვერდზე გავრცელებულ განცხადებაში.
უწყების ინფორმაციით, დევნილთათვის ბინების შესყიდვა კონკურსის წესით მოხდება. საკონკურსო წინადადებების მიღება დღეს დაიწყო და 16 ნოემბრის ჩათვლით გაგრძელდება.
„ჩვენ სურვილი გვაქვს, უფრო მეტი აქცენტი გაკეთდეს ვეტერან-დევნილებზე და მეტად შევუწყოთ ხელი ასეთ ოჯახებს“,- განაცხადა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა დავით სერგეენკომ კერძო პირებისგან საცხოვრებელი ფართების შესყიდვის წესის განმახორციელებელი კომისიის სხდომის დასრულების შემდეგ.
აღნიშულ სხდომაზე განისაზღვრა კრიტერიუმები, რომლებსაც კონკურსში მონაწილე მენაშენეები უნდა აკმაყოფილებდნენ. ასევე დადგინდა საცხოვრებელი ფართების შესყიდვის საკონკურსო პირობები და ვადები.
უწყების განცხადებით, ამ ეტაპზე სამინისტრო საცხოვრებელ ფართებს თბილისში, რუსთავში, მარნეულში, ხაშურში, ბათუმსა და ქუთაისში შეისყიდის. პრიორიტეტი კი თბილისს მიენიჭება.
მამუკა ბახტაძემ დევნილ ოჯახებს ბინები გადასცა >>
საცხოვრებელი ფართების შესყიდვის კონკურსი სამინისტროს, სოციალური მომსახურების სააგენტოსა და სახელმწიფო შესყიდვების სააგენტოს ოფიციალური ვებგვერდების საშუალებით გამოცხადდა. მენაშენეებმა საკონკურსო წინადადებები უნდა წარმოადგინონ სოციალური მომსახურების სააგენტოში, ქ. თბილისი, თამარაშვილის 15ა.
მენაშენეების პროექტის ფარგლებში, 2013 წლიდან დღემდე, სამინისტრომ დევნილებისთვის უკვე 2394 ბინა შეისყიდა.