თბილისი, 3 ნოემბერი — Sputnik. ქუთაისიდან თბილისის მიმართულებით მოძრავი მატარებელი ქარელის რაიონის სოფელ მოხისთან დაეჯახა მამაკაცს, რომელიც ადგილზევე დაიღუპა, იუწყება ტელეკომპანია Imedi.
შემთხვევა დღეს დილით 09:30 წუთზე მოხდა. მამაკაცი ლიანდაგზე გადადიოდა, რა დროს მას მატარებელი დაეჯახა. მოქალაქე ადგილზე დაიღუპა. გარდაცვლილი სოფელ მოხისის მკვიდრი იყო.
„საქართველოს რკინიგზა ღრმა მწუხარებას გამოთქვამს მომხდარის გამო და სამძიმარს უცხადებს გარდაცვლილის ოჯახს. მომხდარის გამო შეყოვნდება ბორჯომი-თბილისის (#685) მიმართულებით მოძრავი მატარებელი, რის გამოც საქართველოს რკინიგზა მგზავრებს ბოდიშს უხდის“, - ნათქვამია გავრცელებულ განცხადებაში.
საქმეზე გამოძიება საქართველოს სსკ-ის 275-ე მუხლის მესამე ნაწილით დაიწყო, რაც რკინიგზის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია. აღნიშნული დანაშაული სასჯელის სახით 5-დან 7 წლამდე ვადით თავისუფლების აღკვეთას ითვალისწინებს.