თბილისი, 1 ნოემბერი — Sputnik. 50 თეთრის ნომინალის ოქროსფერი მონეტების გადაცვლა 2019 წლის 1 იანვრიდან შესაძლებელი მხოლოდ საქართველოს ეროვნულ ბანკში იქნება, აღნიშნულია ეროვნული ბანკის განცხადებაში.
ამ მონეტების გადაცვლა 2019 წლამდე შესაძლებელია ასევე ქვეყნის კომერციულ ბანკებში.
50-თეთრიანმა ოქროსფერმა მონეტებმა გადახდის კანონიერი საშუალების სტატუსი 2018 წლის 1 იანვრიდან დაკარგა.
ოქროსფერი მონეტები ვერცხლისფერმა ჩაანაცვლა. გაყალბებისგან დაცვის თვალსაზრით მონეტის ორივე მხარეს მიკროელემენტის სახით დატანილია ძველი კოლხური თეთრის ანალოგი – ლომის თავის გამოსახულება, ხოლო მონეტის წიბო დაღარულია და ჩატვიფვრულია ქართულ-ინგლისური წარწერა „საქართველო Georgia" და ხუთქიმიანი ვარსკვლავი.
საქართველოს ეროვნული ვალუტა — ლარი დაბადების დღეს 2 ოქტომბერს აღნიშნავს. სწორედ ამ დღეს, 1995 წელს ლარი გადახდის ერთადერთი კანონიერი საშუალება გახდა.
ფულადი ნიშნების დიზაინის პირველ მნიშვნელოვან განახლებაზე მუშაობა 2015 წელს დაიწყო. 20, 50, 100 და 5 ლარის განახლებული ბანკნოტები ეტაპობრივად 2016 წლის 1 თებერვლიდან გამოვიდა და წინა ემისიების კუპიურებთან ერთადაა ბრუნვაში. 10-ლარიანი ბანკნოტები მოგვიანებით განახლდება.