თბილისი, 21 ივნისი – Sputnik. საქართველოს შეიარაღება უახლოეს პერიოდში აშშ–სგან გადასატან საზენიტო–სარაკეტო კომპლექს Stinger-ს მიიღებს, განაცხადა ქვეყნის თავდაცვის მინისტრმა ლევან იზორიამ.
„გახლდით ამერიკაში და გვქონდა პოზიტიური დაპირებები, რომ საქართველო „ჯაველინებთან“ ერთად მიიღებს უახლეს ანტისაჰაერო ტაქტიკურ სისტემა „სტინგერებს“, რომელთა მიღება ასევე წლების განმავლობაში სურდა საქართველოს“, – განაცხადა იზორიამ.
თბილისმა ვაშინგტონს წინადადებით მიმართა, მიეყიდა Javelin-ის ტიპის 410 რაკეტა და 72 მართვადი გამშვები დანადგარი, მათ შორის, ორი მართვადი გამშვები ბლოკი. აშშ-ის სახელმწიფო დეპარტამენტმა 75 მლნ აშშ დოლარის ღირებულების რაკეტების მიყიდვის გადაწყვეტილება 2017 წლის ნოემბერში მიიღო.
სისტემების პირველი ნაწილი საქართველოში 2018 წლის იანვარში ჩამოვიდა.
Stinger — ამერიკული გადასატანი საზენიტო–სარაკეტო კომპლექსია, რომელიც განკუთვნილია დაბალ სიმაღლეზე მფრინავი მიზნების გასანადგურებლად. მისი გამოყენება ასევე შესაძლებელია არადაჯავშნული სახმელეთო ან წყალზედა სამიზნეების წინააღმდეგ.