ბახტაძის მთავრობამ პარლამენტის ნდობა მოიპოვა

თბილისი, 20 ივნისი — Sputnik. საქართველოს პარლამენტმა რიგგარეშე სხდომაზე მამუკა ბახტაძის მთავრობას სამი ახალი მინისტრით (ფინანსთა, ეკონომიკისა და საგარეო საქმეთა) ნდობის ვოტუმი გამოუცხადა.

ახალი პრემიერ-მინისტრის ინიციატივები — საქართველოს ეკონომიკა სხვანაირი იქნება >>

წარდგენილ მინისტრთა კაბინეტს და სამთავრობო პროგრამას 99-მა დეპუტატმა 6-ის წინააღმდეგ მხარი დაუჭირა.

პრიორიტეტულ მიმართულებებად ბახტაძემ დაასახელა დემოკრატიული ინსტიტუტების გაძლიერება, განათლების სისტემის ძირეული რეფორმის გატარება, მცირე და საშუალო ბიზნესის განვითარება, მცირე და მოქნილი მთავრობის შექმნა, ასევე ინტეგრაცია ევროპულ და ევროატლანტიკურ სტრუქტურებში.

„ადამიანი და მასზე ზრუნვა იყო და იქნება ჩენი მთავარი ფასეულობა. ამიტომ ყველა ძალისხმევა თუ ინიციატივა იქნება ორიენტირებული თითოეულ ადამიანზე, მისი თავისუფლებისა და ღირსების დაცვაზე, რათა სამშობლოში ყველას თვითრეალიზებისა და კეთილდღეობისთვის ფართო შესაძლებლობები მიეცეს“, — განაცხადა ბახტაძემ.

ბახტაძის განცხადებით, პარლამენტის წინაშე წარმოდგენილი მინისტრთა კაბინეტის შემადგენლობა დროებითია. უახლოეს მომავალში ის აპირებს წარდგეს ინიციატივით სამინისტროების რაოდენობის 14-დან 11-მდე შემცირების შესახებ.

პარლამენტის თავმჯდომარის ირაკლი კობახიძის თქმით, კანონპროექტი სამი კვირის განმავლობაში დამტკიცდება. შემდეგ ბახტაძე პარლამენტს განახლებულ მინისტრთა კაბინეტს დეპუტატების მხრიდან ნდობის მოსაპოვებლად წარუდგენს.

მამუკა ბახტაძის დროებით მთავრობაში შევიდა:

ეკონომიკისა და მდგრადი განვითარების მინისტრი – გიორგი ჩერქეზიშვილი;

საგარეო საქმეთა მინისტრი – დავით ზალკალიანი;

შინაგან საქმეთა მინისტრი – გიორგი გახარია;

ფინანსთა მინისტრი – ნიკოლოზ გაგუა;

განათლებისა და მეცნიერების მინისტრი – მიხეილ ჩხენკელი;

შრომის, ჯანმრთელობისა და სოციალური დაცვის მინისტრი – დავით სერგეენკო;

ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი – სოზარ სუბარი;

გარემოს დაცვისა და სოფლის მეურნეობის მინისტრი – ლევან დავითაშვილი;

რეგიონული განვითარებისა და ინფრასტრუქტურის მინისტრი – მაია ცქიტიშვილი;

კულტურისა და სპორტის მინისტრი – მიხეილ გიორგაძე;

თავდაცვის მინისტრი – ლევან იზორია;

იუსტიციის მინისტრი – თეა წულუკიანი;

სასჯელაღსრულებისა და პრობაციის მინისტრი – კახა კახიშვილი;

შერიგებისა და სამოქალაქო თანასწორობის საკითხებში სახელმწიფო მინისტრი –  ქეთევან ციხელაშვილი.