თბილისი, 4 მაისი — Sputnik. საქართველოს პარლამენტმა მესამე, საბოლოო მოსმენით დაამტკიცა ცვლილებათა პაკეტი, რომელიც ტაქსის მძღოლებს 1 ოქტომბრიდან სპეციალური ნებართვის გარეშე მუშაობას აუკრძალავს.
ავტობუსების და მიკროავტობუსების მძღოლები არასწორ ადგილზე გაჩერებისთვის დაჯარიმდებიან >>
გარდა ამისა, კანონპროექტი ავალდებულებს თბილისის მერიას 1 ოქტომბრამდე საკრებულოს დასამტკიცებლად წარუდგინოს დედაქალაქში ტაქსით გადაყვანის სანებართვო პირობები, ნებართვის გაცემისა და გადახდის წესი, ვადა და გაცემის ფასი.
სალიცენზიო წესების დარღვევის შემთხვევაში ტაქსის მძღოლი 100 ლარით დაჯარიმდება. ხოლო მგზავრთა უნებართვო გადაყვანა 200-ლარიან ჯარიმას გამოიწვევს.
30 დღის ვადაში ჯარიმის გადაუხდელობის შემთხვევაში ტაქსის მძღოლს ჯარიმის ორმაგი ოდენობის საურავის გადახდა მოუწევს.
კანონპროექტი ძალაში პრეზიდენტის მიერ ხელმოწერის და „საკანონმდებლო მაცნეში“ გამოქვეყნების შემდეგ შევა.