თბილისი, 21 აპრილი — Sputnik. ნაცემი ახალგაზრდა ქალი, კატასტროფის ცენტრმა მრავლობითი დაზიანებებით წნორის საავადმყოფოდან თბილისში გადმოიყვანა, იუწყება საზოგადოებრივი მაუწყებლის პირველი არხი.
ახალგაზრდა ქალი სავარაუდოდ მამამ სცემა. შემთხვევა პარასკევს მოხდა.
როგორ წნორის კლინიკაში აცხადებენ, ქალს კისრის მალების მოტეხილობები აღენიშნებოდა და სასწრაფოდ ესაჭიროებოდა ნეიროქირურგიული ჩარევა, რის გამოც კატასტროფის ცენტრი გამოიძახეს და პაციენტი თბილისში გადაიყვანეს.
გავრცელებული ინფორმაციით, დაშავებული სიღნაღში, მშობლების ოჯახში, შვილთან ერთად ცხოვრობს. როგორც მეზობლები აცხადებენ, ეს მამის მხრიდან ოჯახის წევრებზე ძალადობის პირველი შემთხვევა არ ყოფილა.
შინაგან საქმეთა სამინისტროს ინფორმაციით, მამაკაცი უკვე დაკავებულია და სიღნაღის წინასწარი დაკავების იზოლატორში იმყოფება.
აღნიშნულ ფაქტთან დაკავშირებით, გამოძიება სსკ-ის 126-ე პრიმა მუხლით მიმდინარეობს, რაც ოჯახში ძალადობას გულისხმობს და სასჯელის სახედ და ზომად 3 წლამდე თავისუფლების აღკვეთას ითვალისწინებს.