თბილისი, 19 აპრილი – Sputnik. უახლოეს დღეებში თბილისის ქუჩებში პირველად გამოჩნდება ელექტროავტობუსი, იუწყება „ავტორადიო“ კომპანია Fregobus–ის ხელმღვანელის, მურმან პატარაიას ინფორმაციაზე დაყრდნობით.
თბილისელები სამი კვირის განმავლობაში ივლიან ეკოლოგიურად სუფთა, უხმაურო ელექტროავტობუსით №61, რომელიც ბაგებიდან ორბელიანის მოედნამდე მოძრაობს.
„ეს არის სადემონსტრაციო 12–მეტრიანი ავტობუსი, 35 ადგილი პლუს მძღოლი, 100% ელექტრო, მსგავსი ტიპის თანამედროვე ავტობუსი პირველად ჩამოვა საქართველოში“, – განაცხადა მურმან პატარაიამ.
ელეტროავტობუსი თბილისში ჩამოჰყავთ პროგრამის ფარგლებში, რომლის თანახმად საქართველოში ელექტროავტობუსების ამწყობი ქარხნის მშენებლობა უნდა დაიწყოს.
„საქართველო ელექტრომობილებს გამოუშვებს“>>
„გადავწყვიტეთ, სანამ ამწყობი ქარხანა აშენდება, სადემონსტრაციოდ ჩამოვიყვანოთ ეს ავტობუსი, რადგან ყველამ ნახოს, რამდენად კარგი, სასარგებლო და ეკონომიურია ის“, – განაცხადა პატარაიამ.
პროექტს კომპანია Fregobus–ი ჩინურ კომპანია ZTE–სთან და გერმანულ კომპანია Eurobus–თან ერთად ახორციელებს.